行向自由ê年代

「『高雄事件』食罪（tsia̍h-tsuē）ê人，kah家屬ê目屎、痛苦，lóng kah濟濟台灣人敆鬥陣ah，這个悽慘ê經驗深深櫼(tshiám)入去逐个人ê心肝窟仔，變做性命ê一部份。人民ê目睭足金，現實ê環境，政治有民主無，有合人權ê要求無，不管時lóng會予人民來kā檢驗。」

——《自由時代週刊》1984年4月30

‍

1960年代尾期到1980年代寢頭ê這段時間，西方研究者kā號做「lò-lò長ê 1970年代」（long 1970s），彼陣美國塌(lap)入去越戰ê湳塗(làm-thôo)，進無步退無路，美國原底強勢ê聲望消風tsiânn濟，經濟地位mā受著日本kah亞洲四小龍這款新興ê經濟體來挑戰。彼陣美國kah蘇聯ê冷戰勢面無閣弓(king)甲hiah絚(ân)，毋過美國原仔kā蘇聯當做上大ê威脅。1969年Nî-khik-som（Richard Nixon）總統入去白宮了後，uì中國kah蘇聯tī 1960年代開始ê衝突內底看著機會——美國開始欲kā中共牽倚來，thang來搝蘇聯ê馬跤。美國要求中共對越戰ê代誌袂當插手，中共kōo這來交換美國莫tī台海問題中間出聲。 1972年，Nî-khik-som總統訪問中國，tsiânn有歷史意義，毋過對台灣來講，suah親像閣欲預告一場悲劇仝款。

彼久台灣ê戒嚴體制行超過20冬ah，威權體制開始出現必巡。1970年，海外ê台獨運動者成立「台灣獨立聯盟」，拍拚想欲uì海外來影響島內ê政治。仝彼年，蔣經國訪問美國，予留學生暗殺無成功，政壇大地動。國內外lóng teh起大湧，閣拄著蔣經國欲揣人接班ê時陣，黨內派系亂紛紛，致使伊著愛來變竅，毋才來喝出「革新保台」ê口號，開始欲推捒政權ê「台灣化」。

彼時島內ê政治氣氛小可較冗(līng) ah，本省ê𠢕人投入「增額選舉」，創辦批判政治ê黨外雜誌《台灣政論》，要求民主kah改革。猶毋過政府原仔kā黨外、台獨、共產勢力縛鬥陣，kā看做「三合一敵人」。雜誌出版5期隨予人禁去，兩位副總編輯毋是予人掠去就是旋(suan)去美國，幾若个候選人mā因為政府做票才選無牢(tiâu)。

就算講按呢，黨外力量原仔無勼跤，黨國情報系統是真嚴肅teh應待這寡勢力，兩爿ê對敵隨時是起弓安箭(khí-king an-tsìnn) ê狀態。欲kā歷史掀對後一頁ê時刻已經臨到——一个kā威權講再會、行對自由民主去ê時代連鞭欲來。

9-1  Tī自由進前ê無自由

Nî-khik-som總統入去白宮了後，美中ê關係一聲是鬥甲真峇(bā)，兩爿lóng需要對方相伨(sio-thīn)，才有thang加強𪜶ê國際地位kah聲望。國際範勢連鞭風連鞭雨，大國若teh奕棋子(ī kî-jí)，黨國無才調插手，才予改變ê時期uì遮行來。1978年12月16透早，美國大使趕緊欲見彼時ê總統蔣經國，講美國會tī隔轉工頂晡正式宣佈欲kah中華民國斷交(tuān-kau)，紲欲kah中共建交ê消息。

這粒外交炸彈無張無持按呢搩(kiat)過來，黨國是一聲愣(gāng)去，毋過政府原仔無幾點鐘就決定欲kā危機變做穩定國內政治ê手段——政府宣佈欲kā隔轉年ê「中央民代增額補選」擋起來。黨外人士聽著這个作法隨夯起來，逐家行去街頭抗議。政府隨用kah「匪」有交涉（涉匪）做理由，kā黨外人士掠入去櫳仔內，想欲刣雞教猴。

這款鎮壓suah達到國民黨政府所料想ê效果。翻年9月，黨外人士創辦《美麗島》雜誌，tī台北、桃園、苗栗、台中、雲林、嘉義、台南、高雄、屏東kah東部來設立地方分部，想欲掠雜誌做中心來kā規台灣ê力量lóng總堅(kian)做伙，來成立一个tī黨禁時期「無黨名ê政黨」。拄著國內無仝意見teh浮頭，黨國自然就趕緊欲kā硩(teh)落來。根據尾仔會得解封ê檔案來看，彼時政府毋但啥物lóng會監視控制、收集情報，閣kah地方角頭偷來暗去，叫𪜶kā地方分部摔予害、摃予破，欲予黨外人士知驚。

美麗島事件

1979年12月初10，世界人權日彼工，《美麗島》雜誌社成員tī高雄攑頭旗teh招和平示威ê遊行，suah予阿兵哥kah警察圍起來，鎮暴部隊閣刁工煽動了後，一時仔就起大衝突，政府連鞭kōo「不法叛亂」ê理由，開始規台灣teh掠人。

這个事件mā引起濟濟海外ê華人kah國際社會ê注目kah關心，遊說(iû-suè)、姑情(koo-tsiânn)、要求政府ê審判著愛公平公正ê批信直直寄到，美國政府mā真注意代誌ê發展。窮實，美麗島事件thang tshiah緊就受著四界ê贊聲，kah美國ê台灣人社群ê行動tsiânn有關係。1977年張富雄kah楊宜宜翁仔某創辦「台灣之音」，透過電話答錄機來錄島內ê通訊，予tī美國ê同鄉會得thang隨時聽著上新ê消息。Tī四界輿論kah外交ê壓力之下，政府總算著愛kā這个案件改做公開審判。

1980年2月28，頭擺ê公開調查庭舉行ê仝彼時，其中一个被告林義雄厝內雄雄有攑刀ê惡人挵入去，伊ê老母kah兩个猶足細漢ê查某囝予人刣幾若刀死去。這件滅門血案全台灣lóng著驚，袂少人私底下teh議論講這是獨裁政府「第二擺ê二二八」。政府開tsiânn濟時間才來起造ê政治神話就按呢來必開(pit--khui)，美麗島政治犯家屬kah黨外人士mā tī選舉得著愈來愈濟民眾ê同情kah相伨。

就算情勢變化，黨國原仔teh繼續共彼寡有無仝政治意見ê人算數（sǹg-siàu）。隔轉年，捌tī美國為著《美麗島》雜誌傱錢（tsông-tsînn）ê數學教授陳文成，轉來台灣探望親情朋友ê時，予警總叫去講話，隔轉工suah毋知按怎變做死體(sí-thé)倒tī台大學校內底。1984年，另外一位美國籍ê台灣作家，筆名號做江南ê劉宜良，寫傳記kā tsiânn濟高層ê烏暗代搤(iah)出來，情報機關就去串通竹聯幫ê成員迒過國界去kā暗殺。

相連紲發生ê政治事件，予蹛tī美國ê台灣人拍著驚，袂少人行向街頭去抗議示威，閣kah國際人權組織合作，拚勢欲來爭取予世界看著台灣ê政治環境。其中就有一寡人成立「台灣人
公共事務會（Formosan Association for Public Affairs，簡稱FAPA）」，想欲說服美國國會議員uì外交方面來予台灣ê政府壓力。一部份ê台獨聯盟成員是愈來愈想欲戰，欲用以暴制暴ê方式來行向武裝革命ê路途，𪜶kā炸彈寄去黨國要員ê厝內、大使館、華航kah國民黨經營ê媒體欲kā破壞。

政府對海外台灣人ê政治活動足警戒。透過tī佇外國ê領事館kah人teh講ê「職業學生」彼款間諜，來kā人偷偷仔監視，若受𪜶認定是有可能反對國民黨ê人，就會kā點油做記號，列入去「烏名單」，禁止𪜶閣入到台灣境內。Tsiânn濟人就按呢久年踮tī海外，無法度轉來故鄉台灣，變做予祖國閘tī外口ê政治流亡者。

內外ê人權壓力

海外ê台灣人團體足拍拚，才會得予美國tī 1970年《台灣關係法》內底加入人權條款，要求講美國政府愛關心台灣ê人權狀況。Uì遮開始，陳文成事件、江南案兩層牽涉著美國ê代誌，引起較親近台灣ê美國參眾議員來關心，國會就連紲舉辦幾若場人權聽證會，要求國務院來kā台灣戒嚴實際ê情形講予明，mā對美國kah台灣ê政治關係提出憢疑。

國民黨政府tī人權議題ê歹名聲颺颺飛(iānn-iānn-pe)，美國也開始kā這層囥入政治議程來處理。毋但國民黨政府tī美國學校ê間諜行動受著爭議，美國賣予台灣ê鎮暴裝備kah武器mā予人攑譀鏡(gia̍h hàm-kiànn)檢驗。尾仔，美國國會通過一項修正案，禁止美國政府kā軍事武器賣予人權紀錄無好ê獨裁國家。為欲kā美國對人權ê期待來交待，閣也欲kah國內隨時kā人權顧牢牢ê台灣人權促進會這款組織來對敵，國民黨政府主動tī 1979年成立半官方ê「中國人權協會」，想欲用這个協會來關懷tī泰國hām緬甸交界ê難民kah tī櫳仔內政治犯ê環境，閣提供法律服務，做予外口ê人看，kā人講台灣無kā人權問題落勾去。

總是，效果確實無蓋好。1980年代相連紲發生ê美麗島事件、江南案等等予國際著驚，獨裁政府ê真面無法度閣掩崁。尤其江南案閣牽涉著美國公民予人刣死，美國ê反應是閣較強。外交壓力致使國民黨姑不而將來配合美國做調查，這mā予江南案這个事件，變做1980年代唯一有破案ê重大政治案件。

新政黨成立

1980年代開始，台灣內部ê民間一直有欲民主化ê強烈要求，外口閣有美國用賣軍事武器ê代誌來做威脅，迫政府愛進行民主改革ê壓力。敢欲解嚴抑毋，蔣經國原仔是欲若毋、毋若欲ê曖昧態度，驚講黨國ê根基無細膩(bô-sè-lī)就按呢一聲倒去。不而過，民間呼籲民主化ê聲音是愈來愈大，kah國民黨做對頭ê政論刊物是若著時ê果子teh大出，閣會用無仝ê行動來紀念往陣是禁忌ê二二八事件。毋但按呢，環保運動、勞工運動、婦女運動、族群運動等等ê社會運動是十花五色。猶閣有海外烏名單人士相紲發起回鄉ê運動，一个仔一个欲kā封鎖線挵斷，為著欲轉來故鄉。

1986年，時代起大湧。 2月，隔壁ê菲律賓「人民力量」ê革命kā Marcos政府偃倒，國外ê獨裁政權相連紲受著人民來挑戰，台灣ê威權統治mā已經搖振動(tín-tāng)。5月，一陣台灣黨外人士tī艋舺龍山寺攑旗發起「519綠色行動」，頭擺公開要求政府著解除戒嚴、開放黨禁。9月，風聲tsiânn久ê組黨總算無影變有影，黨外人士tī圓山大飯店來成立本土味tsiânn重ê「民主進步黨」。彼陣猶未解嚴，這个政黨孵(pū)出來，是台灣民主改變上關鍵ê時刻。

拄著這款範勢，就算講蔣經國毋甘願，原仔閘(tsa̍h)時代ê大湧無法，姑不將tī 1987年7月15宣佈台灣地區解除戒嚴，毋過金門kah馬祖彼陣仝款猶是戒嚴。Uì遮，捌成做全世界戒嚴時間上久ê國家，總算是踏出民主化ê頭一步。

講是解嚴，思想kah言論原仔縛甲絚絚袂振袂動，往陣黨國用法律起造，鋩鋩角角閣幼路ê威權體制，mā袂一聲就崩去，kā人民ê自由箍牢牢ê《動員戡亂臨時條款》、《懲治叛亂條例》、《刑法》一○○條等等ê法條仝款照用。為著欲衝破黨國ê控制，推動國家體制行向轉型，予這塊島嶼thang有正港ê自由民主，濟濟民眾行去街頭，爭取基本權利，望講會當予人民真正做頭家。1986年開始，海外ê烏名單人士有發起回鄉運動，直直試欲來挵斷封鎖線thang轉來故鄉。翻轉年年尾，為欲予政府壓力來改選國會，幾若萬ê抗議民眾甚至捌kā縱貫線ê鐵枝路閘起來，閘幾若點鐘久。

自按呢，濟濟政治運動者真拚勢欲拍破政府控制ê資訊管道。𪜶毋若欲要求黨政軍ê勢力退出電視台，mā主動去做地下電台來傳播思想，閣接受民眾Call-in來批評時政ê社會亂象，kā權力分散、kōo電波來放送自由；仝時mā因為網路ê發展，有一个會得提供搜揣台灣ê文史資料、kā台灣大細項社會運動ê弱勢團體ê平台起造起來ah，這就是後手發展起來ê「yam 蕃薯藤」網站ê前身。

《自由時代周刊》ê創辦人鄭南榕堅信「百分之百ê言論自由」是民主上要緊ê代誌，伊繼續挑戰國民黨上大ê體制。就算講tī政治氣氛有較開放ê年代，伊原仔繼續批判政府對思想ê壓迫，閣幾若擺公開講出伊對支持台灣獨立運動ê支持。

1988年，鄭南榕閣tī雜誌刊登許世楷寫ê〈台灣共和國憲法草案〉，欲直挵政治ê警戒線。翻轉年，鄭南榕就按呢予人kā告牽涉叛亂，欲kā傳去法院，伊堅持無欲受掠，為著欲保牢信念，上尾tī周刊總編輯室內底潑汽油放火燒家己。這場kōo性命欲kah伊配ê抗爭，予「言論自由」uì口號變成做(pìnn-tsiânn-tsò)社會ê共識，閣mā kā戰線uì法庭kah街頭搝(giú)去到媒體kah通訊ê方面。

對彼陣開始，台灣社會就行袂轉去彼个著愛激恬恬ê年代。威權體制ê城壁開始必裂(pit-li̍h)，愈來愈濟人行向街頭，攑mài-khuh、kā手裡ê標語攑懸——本底是各人喝各人ê，到今是眾人同齊徛倚來出聲。

‍

9-2若人民開始出聲

1980年代開始，久長來予人壓落底ê台灣社會議題， tī言論自由開闊、公民意識發穎(puh-ínn)了後，一時仔就若地泉按呢濆(bùn)濆出來。Uì勞工權益、性別平等閣到原住民族權利，彼寡往陣僫(oh)得tī公共領域來討論ê問題，就按呢沓沓浮頭，浮去到社會公共言論ê視線內面，規个社會對族群、勞工、性別權利、平等ê想法，mā起造出無仝款ê想像kah追求。

Uì族群來ê呼聲

1970年代，外交ê苦境kah保釣運動，引起少年人對島內議題ê關心，大專學校開始組「山地服務隊」入去部落。Tsiânn濟少年人kā去部落服務ê經驗寫做文章來發表，予社會沓沓了解部落ê生活。仝彼个時間，人類學者kah媒體mā咧出破 (tshut-phuà)「山地問題」。Uì 1978年開始，《中國論壇》刊出李亦園等人ê調查文章，kā原住民族拄著ê借錢剝削、欠醫療資源、童工kah出外去都市做粗工領低薪ê問題lóng搤出來。服務隊有「教化」ê意義，總是mā kā原住民族拄著ê難題捒出去予社會討論。

1970年代尾，黨外運動用台灣人這款論述來挑戰國民黨，原住民族是上有本土意義ê族群，自然沓沓會予人囥入議論。1980年，陳其南教授憢疑「吳鳳神話」是無影，予原住民青年才去想講，到底是啥人teh解說歷史。隔轉年，《中國論壇》刊登原住民學生Iban Nokan（伊凡·諾幹）ê投稿，喝講「權利著爭取才有」，代表原住民族運動意識ê發穎。

1983年， Iban Nokan（伊凡·諾幹）kah Icyang Parod（夷將·拔路兒）鬥陣創辦《高山青》雜誌，主張講著「自覺自救」來kā民族意識叫精神，欲來挑戰彼个原住民久長來lóng失聲、無家己歷史ê解說權ê狀況。這是頭一份原住民家己發行、批判政府ê刊物，黨外雜誌mā會轉刊文章，原住民議題就按呢正式行做社會運動。仝時，台灣基督長老教會是徛tī tsiânn要緊tsiânn關鍵ê位，玉山神學院提出「原住民認同ê神學」，tī 1981年舉辦山地社會kah教會責任研討會，來探討賣身、土地、核廢料等等ê議題。

1984年，黨外編聯會成立「少數民族委員會」，胡德夫來擔任召集人，用募款演唱會kah報導來關心原住民ê處境。為欲kā議題kah參與ê範圍閣較楦闊(hùn-khuah)，胡德夫四界走傱，招著28个創會會員， tī彼年年底正式成立「台灣原住民權利促進會」。

山地服務隊uì 1970年代開始kah學術調查做伙kā部落拄著ê難題搤出來，到1980年代有原住民ê智識份子喝出家己ê聲音，接紲到原住民權利促進會ê成立，過程中看會著原住民運動uì「人替𪜶講話」行到「家己出聲」ê關鍵變化。原住民議題毋但變做台灣民主化運動tsiânn要緊ê一部份，mā代表社會對「多元」kah「平等」有愈深ê理解——民主化毋但改變政治制度，mā著逐个族群lóng會當來出聲參加。

Uì性別來ê呼聲

民主化ê大湧teh起，女性受壓迫ê議題mā沓沓受著公共性ê討論。呂秀蓮是uì 1970年代開路ê人，伊按1971年開始tī《聯合報》寫文章，隔轉年喝出「新女性主義」，主張「先成做人」、「女性uì灶跤行出去」、「人著盡伊ê才調」。伊就按呢uì理論行向實踐，創辦全全女性ê「拓荒者出版社」，調查台北千外个家庭主婦，來kā家庭內底無平等ê情況搤搤出來，閣tī高雄設「保護你」專線，kā予人放捒、予人暴力對待ê人提供法律kah醫療協助，攑起台灣女性社會服務ê頭旗。

濟濟ê拍拚予1980年代ê婦女運動有基礎。1982年「婦女新知雜誌社」成立，用雜誌kah婦女節活動來推捒性別平權，1988年ê「解救雛妓(tshu-ki)大遊行」是「婦女新知」、「彩虹專案」、「婦女救援協會」來主持。這是頭一場女性tshuā頭ê社會運動，代表婦女uì外圍ê行向運動中心ê意義， mā予主流媒體對性別議題有正面ê報導。

Uì遮，婦女運動ê發展愈來愈闊，所關心ê問題mā愈來愈濟項，包括女工、雛妓、性防害、工作權、參政權等等ê公共領域。各項議題內底，民法親屬篇ê修正上蓋關鍵，彼陣民法ê親屬篇條文猶是照父權體制ê理路teh寫，比如囝兒ê監護權著予老爸、某著綴翁蹛、翁仔某財產分配無公平。1989年，作家施寄青建議「晚晴協會」來申請補助，成立修法小組．尾仔尤美女擔任召集人，「婦女新知」kah「晚晴協會」辦理法律課程kah訓練志工，閣組織「婆婆媽媽監督修法小組」，tī立法院旁聽kah說服女性立委。拍拚10冬了後，總算tī 1990年代修法成功，廢除囝兒監護權著予老爸、某著綴翁蹛等等ê條款，實現翁仔某財產分配ê平等，婦女tī婚姻kah家庭內底ê法律地位tsiânn明顯有改善。

Uì勞工來ê呼聲

戒嚴時期，台灣工會予國民黨控制tsiânn久，正經是人teh講ê「花矸仔工會」，勞工普遍無才調來組織，mā欠法律智識。1984年5月初一ê國際勞動節，勞工、律師、學者同齊成立「台灣勞工法律支援會」，提供免費ê法律諮詢，閣出版《勞動者》雜誌來推捒(tshui-sak)勞工權利ê觀念。

法律智識kah組織經驗若有，勞工運動就會當閣較勇健(ióng-kiānn)。1985年新竹玻璃公司員工得著「勞支會」ê協助，成立臨時管理委員會欲來自救；1986年遠東化纖工會使用「勞支會」提供ê選舉戰略kah談判手路，成功提著所有ê理監事席次。1987年閣發動年終獎金ê運動，引起全台灣ê勞資爭議，mā影響工會逐个來鬥陣徛起，「勞支會」就按呢uì「台灣勞工法律支援會」改組做「台灣勞工運動支援會」，對法律協助湠到工會ê籌備、教育kah抗爭ê支援，閣mā協助銀行、客運、製造業等方面來成立工會，總共超過70个工會，也起造出完整ê工會籌備流程。

1890年代尾到1990年代初期，「勞支會」閣改組做「台灣勞工陣線」，其他ê勞工運動團體mā相連紲來出現。彼當陣親像五一遊行kah秋鬥這款較大ê集會不時看會著，工場徙去海外了後suah致使勞工無頭路，𪜶mā組織「全國關廠工人連線」，用倒tī鐵枝路、閘車等等較激烈ê手段來爭取補償，予社會注意著勞資無公平ê實況。

勞工運動ê力量愈來愈強，mā迫甲政府著愛來推捒ê法律改革， 1984年制定《勞動基準法》，3冬後閣成立行政院勞工委員會，翻年閣通過《基本工資審議辦法》，mā繼續修訂「勞動三法」——《勞基法》、 《工會法》、《勞資爭議處理法》，予勞權議題正式行入去立法ê核心。

9-3 迎接自由臨到

出現頭一个本省人總統

1990年代，街頭ê抗議聲猶是真鬧熱，體制內底ê權力已經開始重新閣再鋪排。1988年新曆正月13，蔣經國過身，副總統李登輝照憲法來接任總統，台灣就按呢迎接頭一个本省人總統，mā迎接uì社會運動行向制度改革ê新坎站。這个時期ê總統李登輝有影是頭殼𢯾teh燒，操勞大細項代誌。1987年解嚴了後，社會運動滾絞袂煞。黨內閣有把持軍權ê參謀總長郝柏村、國民黨秘書長李煥、司法院長林洋港這款黨、政、軍大頭兄所形成ê「非主流派」，kah李登輝ê「主統派」teh相觸。1990年ê總統選舉閣較是這場權力鬥爭ê關鍵，「非主流派」想欲派林洋港、蔣緯國來參選，尾仔雖然講黨內壓力致使林洋港退選，毋過黨內派系問題猶未解決，閣有萬年國代干焦顧家己teh敲油ê爭議，予社會滿腹ê憤火做一改煏開。

1990年，李登輝tī國民大會間接選舉順利來連任總統，這場選舉suah是引起tsiânn大ê政治風波。彼久國民大會ê代表大部份是1947年tī中國大陸選出來，尾仔才綴中華民國來台灣，了就毋捌改選ê「萬年國代」。這寡萬年國代早就無代表民意，閣欲趁這擺選舉提出干焦顧家己腹肚ê敲油提案。

實際上tī兩蔣ê時代，這寡國大代表早就慣勢靠正副總統選舉ê權力來敲油，這擺敲油ê提案，包括欲愛逐年定期開國民大會、kā會議ê出席費提懸tsiânn濟等等，這款提案予公共言論是隨夯起來，紲來就爆發tsiânn大規模ê抗議運動。

1990年，大學生來到中正紀念堂ê廣場聚集，𪜶搝一條「同胞們！我們怎能再容忍七百個皇帝的壓榨！」ê布條tī遐靜坐示威，要求欲來解
散國民大會、廢除《動員戡亂時期臨時條款》。彼陣中正紀念堂人是櫼(tsinn)甲插插插，相伨抗議ê民眾閣kā國民黨ê黨徽噴漆寫字：「土匪黨下台、老賊下台吧」。 南部ê高雄市原仔有學生開始行動，幾若間大學綴leh罷課，大學教授mā加入去靜坐抗議，閣有人tī學校招欲罷教。到遮，行動已經湠kah全台灣ah——這場尾仔予人號做「野百合學運」ê行動，變做台灣民主史足重要ê路觀牌。

3月18，tī學校中間頭擺ê會議內面確定這改學運ê 4大訴求：「解散國民大會」、「廢除臨時
條款」、 「召開國是會議」、「制定政經改革時間表」，4項要求反映彼陣台灣社會對國民黨自1949年開始ê威權高壓統治大大ê不滿，是眾人對政治改革上深上強ê呼聲。

3月21，李登輝總算當選第八任總統。當選了後，伊隨召集國民黨中央常務委員會，決議舉辦國是會議，也tī仝彼暗kah學生代表見面，約束講會冗早(liōng-tsá)召開國是會議。紀念堂頭前ê學生隔工透早發佈撤退聲明，這擺ê運動就按呢來煞鼓。

仝年5月，李登輝tī就職演講ê時宣佈1冬內欲結束「動員戡亂時期」，2冬內會修改憲法、改革政府體制ê約束。仝年6月底到7月初召開國是會議，朝野無仝黨派、學者專家同齊來討論憲政改革ê議題。會議有幾若項共識，包括kā動員戡亂時期擋起來， 台灣省長、台北市長、高雄市長直選， 閣有總統民選、毋捌改選ê中央民意代表退職等等。

確立民主政治

1991年5月初1，李登輝總統宣布《動員戡亂時期臨時條款》停止，代表台灣正式kah「反攻大陸」ê政治神話告別，閣有主權欲落實tī台澎金馬。仝年12月，資深ê中央民意代表全部退職，「萬年國會」時代就按呢正式結束。1992年年底，立法委員全面改選，成做台灣歷史頭一擺完全是由台灣選民頓票所選出來ê中央民意機關。雖然結果猶是國民黨佔多數，毋過民進黨得著31% ê票，成做重要ê在野力量。

Tī 1991年到2005年ê中間，台灣lóng總有7擺ê修憲，一步一步建立kah台灣現實鬥較會峇ê憲政體制。修憲ê內容包括確定總統kah副總統著愛是人民直接選舉來決定、kā台灣省政權ê功能冷凍起來、調整行政院kah立法院ê權力關係、確定領土改變著愛公民複決等等。

解嚴kah尾仔幾若擺ê修憲調整，予中華民國總算是無閣掠反攻大陸做目標，mā按呢來取消根據反攻大陸這个目標才生出來ê戰爭動員狀態kah威權統治。國家內部mā無閣是老國代做代表，民意代表是台灣人民家己頓票選出來ê，uì遮，台灣正經變做台灣人做主ê民主政體。

總是， tī台灣政治沓沓仔行向民主路途ê時，海峽對面ê中國mā行去到另外一个歷史ê坎站。1980年代，鄧小平喝講「和平統一」，欲用「一國兩制」當做對台灣政策ê大方針，仝彼時mā準備欲迎接香港回歸。這段時間，中國tī經濟方面推捒改革開放，政治方面suah原仔是控制甲絚絚絚。1989年6月初4，北京天安門爆發學生民主運動「六四天安門事件」，中國政府尾仔是用戰車kah軍隊來粗殘鎮壓，全世界是看甲大著驚。這場事件予國際社會看清中國ê經濟雖然有開放ah，政治方面suah是仝款專制，mā予台灣社會對「一國兩制」有tsiânn大ê憢疑kah警戒。

1990年代初期，台灣ê民主改革行進前，兩岸政治制度ê差別就愈來愈明。1996年，台灣人頭擺會得thang直接選總統kah副總統，李登輝kah連戰提著54% ê票來當選。這場選舉毋但kā李登輝ê政治地位拍甲tsiânn穩在，mā是代表民主制度已經tī台灣釘根。

1996年這場tsiânn有歷史意義ê選舉mā引起中國對台灣ê軍事威脅。Tī頓票進前，中國ê人民解放軍tī台海四箍輾轉有幾若擺ê軍事演習kah飛彈試射。1996年3月ê選舉期間，飛彈tī沿海kah台海地區是愈射愈濟粒，想欲用武力來嚇驚、影響台灣ê選情。搪著外來威脅，台灣人原仔是無勼跤勼手，顛倒有76％ ê人行入頓票所，用選票看顧tsiânn無簡單才提到手ê民主。

這場選舉毋但kā國際社會展示台灣ê民主成就，mā予「台灣認同」沓沓浮頭，變成做社會ê集體意識。Uì彼時開始，海峽兩爿毋但烏水溝遐闊，閣有天差去地ê價值觀kah政治制度——一爿欲挃民主、自由、人權，另外一爿是欲堅持專制kah軍事統治。

李登輝teh搦權(la̍k-kuân) ê時，台灣ê政黨政治愈來愈有款，mā沓沓變做今仔日ê政治範勢。1993年，趙少康、王建煊這寡國民黨ê成員無滿意李登輝ê改革方向，就退出國民黨閣組「新黨」；民進黨繼續teh kā政治版圖閣弓予較闊，1994年陳水扁當選台北市長，3冬了後閣tī縣市長選舉贏去到12个縣市，變做kah國民黨tī地方層面teh捙拚ê勢面。

李登輝tī 12冬ê期間tshuā台灣uì威權行向民主，推捒中央民意代表全面改選、總統直選等等ê大改革，kā民主化ê基礎拍甲閣較在。猶毋過民主愈行，統獨爭議、族群kah政治矛盾(mâu-tún) mā愈來愈成做課題，是台灣社會定著愛去處理ê挑戰。

2000年，李登輝卸任總統，民進黨ê陳水扁當選總統，完成台灣歷史頭擺ê政黨輪替。這擺ê政黨輪替代表代議民主機制有好好仔實行，mā代表台灣tī政治自由化ê路途行到重要ê坎站，uì遮欲閣踏入多元改革kah國家發展新ê階段。

‍