海洋競逐的年代

陳第所描寫ê東番台灣，就若像引文內底荷蘭牧師所描寫ê景致，是野生動物濟濟款式ê世界，mā是這座島上無仝部落ê原住民族teh生活ê所在。

17世紀ê時，世界拄teh認捌台灣，彼時全世界ê人口猶無這馬ê十分一；彼時，tī地球走上緊ê交通工具干焦帆船kah馬。天光就做、天暗就歇，tsiânn濟人透世人毋捌離開庄頭，不止濟ê所在，是連啥物號做「國家」都猶捎無摠(sa-bô-tsáng)。

彼時，勢面當強ê伊斯蘭帝國kā欲uì歐洲到亞洲ê這條通向東方ê路草猶搦絚絚(la̍k-ân-ân)，荷蘭人林斯霍登（Jan Huygen van Linschoten）出版《東印度水路誌》這本冊了後，kā百外年來予西班牙、葡萄牙所獨占ê行船智識，予閣較濟人會當知影，mā致使tī宗教改革了後，信仰新教ê這陣人去向傳統ê天主教王國來挑戰。大大隻ê帆船，kā咱人對冒險kah錢財ê向望，載去到遠遠遠ê所在，毋但是帶動資源kah互相交流文化niâ，mā kā無情ê殖民火砲，紮去到美洲kah東南亞ê國家。

 

國運已經有2百外冬ê大明帝國， tī這時所面對ê，是內外齊teh起交繃(kau-penn) ê形勢，東北關外ê女真人kah東南沿海ê賊寇，lóng予帝國ê軍隊著愛傱遮傱遐，強強欲接載(tsih-tsài)袂去。毋但按呢，大明帝國kah日本ê豐臣軍tī朝鮮半島彼擺激烈ê戰爭，mā予國家財務ê擔頭加真重篤(tāng-táu)。就算是按呢，大明帝國猶原拚勢teh維持天朝tī東亞海域ê影響力。閣較硬篤，伊mā欲kā這个大國ê尊嚴楗(kīng)予牢。

臺江內海無風無湧，千里萬遠佇海外彼寡看起kah伊一點仔關係都無ê 人物事，煞佮伊ê 命運有牽連。佇外口人踏入來島裡了後，臺灣嘛予四箍圍仔ê 競爭勢力絞絞落去，早前毋捌佮人相爭過ê 島嶼，才一目𥍉仔爾，就變做是全世界相爭欲挃ê 重要所在。

16世紀以來，船隻駛過台灣四箍仔ê外來者，留落各種ê紀錄kah文獻，mā是咱現此時提來想像早期ê台灣到底是啥款生活模樣ê重要資料。

斯當時kah外口人接接(tsih-tsiap)上濟ê島上原住民族，tī北台灣是淡水、金包里、雞籠、三貂這搭ê Basayer（巴賽人）；tī南台灣ê台江內海四箍圍仔遮，有4大部落：蕭壠社、麻豆社、目加溜灣社、新港社。

到17世紀了後，日本人kah閩浙這搭ê漢人相敆做「賊寇」，是海面上橫霸霸ê海賊，𪜶最主要用走私來趁大錢，這陣海賊mā成做歐洲人來亞洲ê時，上蓋重要ê生理伴。

歐洲人前往亞洲的原因，不僅止於香料的商業利益。荷蘭在西班牙的統治之下渴望獨立，歐洲國家彼此之間的緊張關係，最終改變了亞洲的歷史。

Tī日本、中國、呂宋這幾个所在來來去去ê船隻，台灣當然是𪜶tī海面上定著會經過ê地點，遮ê海上過路客，tī台灣四箍輾轉家己來閣家己去，島裡ê原住民看久mā慣勢ah，準講來ê人好鬥陣閣善良，就會當互相來往，交換物件，若是去搪著海賊上岸搶劫，就會kah𪜶俥拚或者是規氣走閃，規年迵天攏是按呢。

毋過，到17世紀了後，原住民才雄雄發覺，這改uì海面上來ê這陣人，竟然開始teh占地起城，若親像是無拍算欲閣徙岫ah。

17世紀初，賊寇李旦用台灣做基地做走私ê生理，tī 1620年代ê台江內海遮，形成一个差不多有160人hiah大ê庄頭。過無偌久，無論是攻澳門抑是占澎湖lóng齊失敗ê荷蘭人，tī李旦做公親調解了後，1624年ê時，mā tī南台灣ê台江內海蹛落來。

就tī這時，一直對荷蘭人tsiânn提防ê西班牙人，mā隨綴tī後壁，踮北台灣ê雞籠、淡水前後來起城，準備貿易ê事項，mā kā天主教ê信仰傳來予北台灣閣有日本、福州這幾个所在ê人知。

島裡ê原住民無去予拄來到地ê歐洲人ê氣勢喝(hat)倒，𪜶檢采是用家己原本ê庄頭文化所有ê智識認捌外來ê勢力，有當時仔mā會巧巧仔用外交手段kah𪜶盤撋(puânn-nuá)。

就親像tī淡水河北岸ê林仔社人（Sinack，圭柔社），西班牙人捌tī𪜶ê庄仔內起玫瑰聖母教堂（de la Virgen del Rosario）。聖像安座ê彼一工，林仔社人透暝唱歌跳舞，落成了後，庄裡ê囡仔mā不時會去教堂圍teh看𪜶祈禱、聽𪜶唱聖歌，這款情境mā予西班牙人看做是傳教有成功ê證明。

啥人知，當當(tng-tong)西班牙人決定欲tī林仔社人ê對頭—八里坌人ê庄裡mā來起教堂ê時，林仔社規庄ê人suah kā神父刣死，了後規庄頭ê人就lóng走路ah。這款行為予西班牙人不止仔憤慨，評批林仔社人tsiânn野蠻、出賣信仰，猶毋過對林仔社人來講，𪜶接受、親近教堂ê原因，是因為教堂所代表ê是「得著西班牙人ê力量」，𪜶當然無法度接受西班牙人kā這款力量「分張 (pun-tiunn)」予長期teh做對頭ê庄社。

1627年ê熱人，新港社ê頭目理加（Dicka）tshuā新港社人kah漢人通事等總共16个人，tī船長濱田彌兵衛ê介紹之下前往日本，成功去到江戶，拜見幕府將軍德川家光(Tik-tshuan Ka-kong)，而且閣予日本人尊稱做「福爾摩沙之王」。會談了後，理加主張欲kā土地獻予德川將軍，來交換對抗荷蘭ê助力；德川有回送銀條kah布帛(pòo-pit)等等ê禮物，毋過無接受伊所獻出ê土地。新港社人這款「交遠攻近」ê計畫，荷蘭人當然是看袂上目。

隔轉年理加這陣人轉來大員ê時，就去予荷蘭ê台灣長官努易茲（Pieter Nuyts）下令總kā掠起來，將軍所送ê禮物mā全部去予沒收去。

濱田彌兵衛kā努易茲ê這款行為，看做是對德川將軍無尊敬，就tsiânn憤慨向荷蘭人開刀，tī談判ê過程當中，伊kā努易茲縛起來，德川幕府mā隨下命令，停止荷蘭人tī日本做任何ê生理，這層代誌對跤步才拄徛在ê荷蘭人來講，有影打擊tsiânn大。

落尾手，荷蘭聯合東印度公司Batavia（巴達維亞）總部考慮著利害得失了後，決定kā努易茲免職，閣kā伊送去予幕府關禁，用種種賠罪ê方式來交換日本ê原諒。理加tī這層事件了後，繼續擔任新港社ê頭目，一直到1650年過身為止。

西班牙人tī 1626年就踏入台灣北部ê雞籠這个所在，毋過𪜶想欲統治規个北台灣這个計畫，一直lóng進行甲無啥順利。1620年代ê末期，美洲白銀ê產量愈減愈少，mā連帶著運入去馬尼拉kah雞籠ê白銀綴leh變少。Tī無空ê情形下，漢人teh做走私這途ê生理人，就毋願閣冒險來北台灣kah西班牙人做生理。講著傳教這方面，雖然天主教mā捌傳到噶瑪蘭這搭遮來，毋過原住民願意改變信仰ê程度kah條件，mā lóng無thang達到西班牙人所期待ê目標。西班牙人tī台灣ê十幾年中間，前前後後上無犧牲３个神父，後來西班牙人mā因為kā經營ê重點沓沓徒去到菲律賓群島ê南爿，台灣ê西班牙勢力就無後援軍ah。所致，𪜶無法度閣kā原住民抵抗ê力量壓落去，干焦會當勼tī城堡內底。

同時期來到臺灣的兩群歐洲人，最終卻有了截然不同的發展。對臺灣而言，荷蘭人趕走了西班牙人是政權的迭代；對荷蘭人而言，則是在漫漫獨立戰爭中，所贏得的一場重要戰役。

1642年8月，一直掠台灣北部金金看ê荷蘭人，踏入來和平島，荷、西雙方經過５工ê軍事衝突了後，西班牙人就離開基隆kah淡水。到甲這時，荷蘭人總算kā全台灣沿海會當行跤到ê所在，lóng收入去𪜶經營ê範圍，會使講全台灣lóng有荷蘭公司ê代表，會當前往原住民ê庄頭，去kah𪜶交涉做生理。

1630年代，日本幕府為著欲禁止天主教tī日本傳教，下令禁止西班牙人、葡萄牙人去日本，甚至禁止日本人出帆，才會予信奉新教ê荷蘭人變做唯一會當去日本做生理ê歐洲勢力。成做中站ê台灣，地位mā變甲閣較重要。

1630年開始，荷蘭聯合東印度公司tī台灣這个基地投入不止濟ê資源，閣起造足有氣勢ê海上城堡「熱蘭遮城」（Zeelandia），這就足足有夠額來鎮壓原住民ah，猶閣予公司展威風ê兵力mā一批仔一批來到台灣。

1635年底，為著欲報仇，一團強欲5百人ê荷蘭大軍去攻麻豆社，拄仔好彼時tī麻豆社有tsiânn濟人出珠，致著這款病ê戰士超過一半，會使講無力thang去阻擋，麻豆社人干焦會使四界逃niâ，這个17世紀南台灣ê第一大社，就tī這時宣布輸予荷蘭人ê銃火。

有武力ê加持了後，荷蘭人閣進一步出兵，消滅tī高屏外海ê小琉球島原住民，kā小琉球島變做是大員港ê後備外港，有幾偌改閣tshuā Siraya社組織庄社聯軍，上北去拍中台灣ê虎尾壠社（Favorlang，華武壠社），這除了是為著tsiânn交易(ka-ia̍h) ê鹿皮貿易，欲kā草埔kah獵場楦予閣較闊以外，另外一方面mā是teh利用這款軍事行動，予已經聽命令ê原住民勇士有獵人頭ê機會。

看著荷蘭軍隊見戰見贏，予原住民開始有想欲去接受基督教這層代誌。

親像tī 1637年10月，荷蘭人tshuā庄社聯軍戰贏虎尾壠人了後，原底kah荷蘭人上對立ê麻豆人kah蕭壠人竟然主動向牧師表示講，𪜶願意無閣欲拜神尪仔，欲改信基督教。無定著tī𪜶ê心目中，改去拜「戰神基督」會比拜本底ê神明，閣較會當保庇𪜶相戰會贏。

第一個治理範圍跨及全臺南北各區域的政權，儼然成形。

毋但有歐洲人、日本人kah「唐人 (tn̂g-lâng)」（彼當陣慣勢kā tī海外teh走跳ê漢人叫做唐人）， tī海洋時代猶有tsiânn濟無仝民族出身ê人，tī台灣kā𪜶ê生命跤跡留落來。

親像台灣民間傳說內底，看會著tsiânn濟烏鬼井、烏鬼埔這款地名，遮講ê「烏鬼」，毋是咱現此時所講ê、俗稱烏人ê非洲人，是teh講較烏肉底ê東南亞人，像西班牙人tshuā去到雞籠ê菲律賓卡加延人、邦板牙人；荷蘭人tshuā去到大員ê班達島人、爪哇人、廣南人、孟加拉人等，𪜶濟濟lóng是以奴才ê身份來台灣ê，毋但愛kā主人做工閣愛去相戰。

台灣沿海原住民ê血脈，mā tī這逝歷史ê大水流中間湠向世界。1636年，小琉球島予荷蘭人硬趕甲無半人，島裡好運活落來ê，予人拍派(phah-phài)去做奴才，包括規百个囡仔予Siraya人或者是荷蘭家庭收養，有一寡查埔囡仔大漢了後，成做荷蘭聯合東印度公司ê船員抑是兵仔，查某囡仔就會嫁予蹛台灣ê荷蘭人。

荷蘭人對台灣ê統治，一直到鄭成功大軍攻入來了後才停止。

Tī雙方起衝突、相戰進前，海上ê貿易就是鄭氏家族tī財政上蓋重要ê來源，mā因為按呢𪜶kah荷蘭人一直tsiânn激烈teh競爭，落尾手鄭成功閣主張欲kā先人ê土地收轉來，就決定欲攻台灣。

到底，鄭氏家族kah台灣有啥物底代？

為著欲化解鄭成功ê憤慨，荷蘭台灣議會決定派出一个遊說者去廈門kah鄭成功談判。伊就是何斌──一个唐人出身ê台灣贌稅商，就tī這時，徛上歷史ê舞臺。

有一寡小說內底，kā何斌講做是一个長期tī台灣恬恬為漢人做代誌、有民族情義ê人物。若uì現實ê角度來kā看，何斌出世tī生理人ê家庭kah伊唐人背景，無定著更加值得咱去研究。

何斌ê父親「kimting」（mā有翻譯寫做「何金定」）， tsîng早就是tī馬尼拉teh做生理ê唐人，荷蘭人kā北台灣ê西班牙人趕走了後，伊就予𪜶倩來做通事，協助荷蘭人來接收kah建設北台灣，mā按呢加入荷蘭人經營治理台灣ê團隊。

這个kimting過身了後，何斌繼承家族事業，uì公秤稅、烏魚稅、贌社稅、港潭稅到稻米稅、人頭稅等等，逐項包稅ê業務lóng有做著。

彼時因為中國戰亂，一批過一批ê災民渡過烏水溝來台灣，清國想欲用海禁來kā鄭成功擋tī海外，顛倒予何斌uì包稅ê產業內底得著各種ê物資，遮ê物件tī華南地區鄭氏ê地盤內底一直lóng tsiânn搶市。就是按呢，tī鄭成功kah荷蘭人貿易有糾紛ê時，荷蘭人選擇請何斌去廈門替荷蘭人談判，來解除商業危機。

猶毋過，荷蘭人mā毋知何斌kah鄭氏這改ê談判，到底有交換啥物？

一直到1659年，何斌予人告講伊私底下kā uì大員去廈門ê商船抽稅（民間講「報水」），荷蘭人決定欲重重處罰何斌，kā伊ê各項職務全部剝掉，取消伊ê包稅經營權，閣kā罰款3百real，差不多是荷蘭台灣長官5個月ê薪水。判決出來了後，何斌就旋(suan)去廈門，投向鄭成功ê陣營。

Uì李旦、鄭氏父子到何斌，遮ê lóng是有國際背景kah海洋個性ê海上唐人，𪜶順趁時代大環境ê變化，有時奸巧、有時好膽去做選擇，𪜶ê運命kah台灣海島相敆相接，予歷史ê發展行向無仝ê局勢。

到甲這時，台灣這座島嶼歷史上ê第一个漢人政權，就欲正式建立ah。

 

鄭成功tshuā軍隊攻下台灣大員了後，無偌久就破病過身，鄭成功留tī廈門ê大漢後生鄭經繼承鄭氏集團ê領袖地位，用「明延平王嗣封世子」ê名號繼續行𪜶老爸奉明國永曆做正統、用海上貿易培養勢力來對抗清國ê這條路線。

鄭經治理台灣ê頭10冬，對外仝款kah荷蘭人teh做對頭，派兵去攻荷蘭人tī雞籠猶留leh ê基地， mā捌去tsiânn遠ê柬埔寨(kán-poo-tsē)，kā在地ê荷蘭聯合東印度公司商館規个毀掉去；對內是推行屯田政策，kah原住民ê庄社不時teh起交繃，中台灣大肚王國ê沙鹿社是上慘ê，鄭氏軍隊來過了後，規庄予人刣甲強欲空去。

為著欲kā鄭氏ê海上貿易遏予斷，清國嚴格進行「遷界」，也就是壓迫蹛tī倚海ê人愛搬徙到較內圍ê所在，予鄭氏無才調提著江南絲瓷ê貨。

猶毋過，照文物所看著ê，其實tī清國禁止中國瓷仔外銷ê時，鄭氏就改用日本九州肥前瓷仔賣予歐洲人，做生理ê手路有影是tsiânn活。

就算清國kah荷蘭人聯合起來欲對抗鄭氏集團，tī鄭經時代猶原有kah日本、馬尼拉、柬埔寨等等遮ê所在建立行船ê路線，閣邀請外國人來台灣做生理，親像英國東印度公司就予𪜶邀請來大員設商館，毋但賣軍火予鄭氏，mā kā亞洲ê商品買轉去。

1669年，清國派重要大臣納蘭明珠來苦勸投降，無論清國按怎迫按怎唌，鄭經回批拒絕，講家己「遠絕大海，建國東寧，於版圖疆域之外別立乾坤」，日本mā kā鄭經稱呼做「東寧國主」。1672年鄭氏kah英國雙方面ê通商條約當中，英國人更加是kā鄭經尊稱做「台灣王」（King of Tywan），可見東寧王國tī斯當時確實有伊ê實質地位。

是講，鄭經想欲建國ê理想，suah tī清國ê「三藩戰爭」了後，全部碎溶溶去。

1674年，福建靖南王耿精忠邀請鄭經做伙出兵渡過海峽，彼時漳州、泉州、惠州、潮州、汀州等等遮ê所在lóng有予拍落來，毋過，後來耿精忠兵敗投降了後，鄭兵kah清兵ê戰爭就若牽龜落湳仝款，無論鄭經按怎攻就是無法度kā福州提落來，清兵mā無才調拍贏，雖然清國有幾偌擺差人去苦勸鄭經退兵，毋過雙爿面對和談ê條件一直lóng講袂峇。

戰幾若冬了後，傷重(siong-tiōng) ê軍事費用予東寧王國ê財政是愈來愈困難。1680年，鄭經姑不而將kā tī福建所占ê地盤全放掉，退轉來台灣。凊心失志ê鄭經就kā政務多數交予大漢囝鄭克去處理，另外閣tī這馬ê開元寺這搭起一个行館，隔轉年就過身去。

自17世紀荷蘭人統治大員了後，法律、稅制、規劃行政區等等ê制度mā予荷蘭人引入來台灣，「國家」這个概念uì無到有了後，就牢tī台灣人ê頭殼內。

Uì荷蘭聯合東印度公司ê商業主義、明鄭東寧王國ê儒教文化，一直到大清ê帝國思想，前後跤來到台灣ê這幾个政權，治理台灣ê目的kah手段雖然精差蓋濟，毋過tsiânn濟制度會使講是「荷規鄭隨、鄭規清隨」。

1635年，荷蘭人用武力ê優勢，迫麻豆kah拍契約，訂一个「麻豆社條約」，短短幾條文字，予麻豆社人kā家己ê主權棄捒。

1642年起，荷蘭人利用「贌社制度」，kā原住民庄社ê稅務，用投標ê方式，外包予出上懸價ê漢人生理人，標頭只要kā稅金納予有夠額，就會當kā庄社買賣ê物件攏貿落來。

鄭氏東寧王國時期，繼續用彼款｢乖ê食糜，無乖ê食箠｣管理庄社ê手段，mā會定期公開招標來辦理贌社。

清國來了後，mā kā這个制度紲接落去，tī 1699年所發生ê「吞霄社事件」，就是因為吞霄社人對贌社制度不滿來引起ê爭議，刣死通事集團十外个人，清兵是派遣西拉雅彼四社做先鋒，來去征服ê，予原住民家己去互相相刣。

規个17世紀，征服kah贌社是台灣西南平原地區原住民kah外來ê統治者互動ê基本模式，「麻豆社條約」白紙烏字ê束縛，kah一隻牛剥雙層皮ê「贌社制度」，經過荷鄭清三代了後，kā平埔原住民族ê生態，全部改變了了。

就算是統治者來來去去、朝代改換，tī台灣島所實行ê制度，就若樹欉釘根，大大影響後世ah。