臺灣的故事

Ch.01

台灣歷史tio̍h對佗位講？對海洋出世到島嶼有形，對上早彼陣人到kah今仔日，逐ê坎站lóng看有島嶼頂面ê人按怎適應環境、按怎創新技術ê智慧。對考古ê發現，咱聽好重建早期居民生活ê方式、社會結構kah信仰體系，閣來思考kah當代原住民文化ê關聯。

Ch.02

掠文字記載做基礎ê文明歷史觀，kah人ê經驗做基準ê原住民口語傳說，是無仝的世界觀。Tī其他人猶未來進前，這粒島嶼頂面ê居民，欲按怎來理解家己ê世界？對傳說，到口傳kah文字起造，閣去到史料內底ê痕跡，原住民眼內ê台灣生啥物款leh？

Ch.03

17世紀是歐洲勢力入來亞洲ê起頭，嘛代表講台灣進入早期全球貿易。不而過，tī歐洲人來進前，亞洲ê海毋但有在地政權，海上嘛早tō足活動。海商kah海賊、漁民kah移民，欲按怎kah歐洲人同齊起造複雜ê網絡，掀開台灣歷史新ê一頁？

Ch.04

17世紀尾，清帝國開始統治台灣，統治者畫一條「番界」，共島嶼分拆做東爿kah西爿兩大部份。仝彼ê時間，一陣koh一陣漢人移民teh kā原住民生活空間tshi̍h kah，嘛致使in文化kah世界觀受著衝擊。番界政策kā台灣破兩爿，迒過界ê人suah有通kā無仝生活空間紩鬥陣，in是按怎來畫台灣ê面腔neh？

Ch.05

19世紀，工業革命大湧kā全球絞lue̍h去，歐洲帝國主義當teh興，東亞海域原底ê政治kah經濟貿易體系受著tsiânn大ê衝擊，台灣嘛仝款hông絞入去，kā對外ê港口開開。痟講欲楦勢ê強權紛紛行跤到這粒島嶼，新帝國取代舊帝國，對台灣koh有啥物款ê影響？

Ch.06

1895年，台灣對清帝國ê邊境，變做日本頭一ê海外殖民地。殖民者kā電力、鐵枝路等等現代設施tshuā入來台灣，推捒經濟發展，仝這陣嘛衝擊著本土文化。Tī帝國統治下跤，台灣社會開始體驗現代社會ê光kah烏，有寡人就按呢開始走揣自我ê身份認同問題。

Ch.07

1940年代，亞洲是予戰爭ê烏影罩頂，對二次世界大戰、國共內戰，去到韓戰、越戰。對誠濟國家來講，1945年凡勢是「終戰」ê時陣，嘛是「戰後」ê起鼓，毋過對東亞國家來講，戰火窮實毋bat離開。這相連紲ê衝突欲按怎來重新組織亞洲ê戰後秩序，按怎來改變台灣？

Ch.08

Tī全球冷戰ê範勢下跤，台灣ê統治者反共ê旗仔攑leh，動員人民對抗外部敵人kah內部ê叛亂份子。有一段時間，台灣人是為著反攻大陸ê理想來活。毋過國際範勢leh變化，台灣人嘛著愛面對現實、重新思考家己ê位，in ê答案會是啥物？

Ch.09

老百姓kah街頭運動捒時代ê gí-á有法，倚欲四十年ê戒嚴體制，總算tī1980年代尾來煞鼓，台灣開始行對民主化去。毋過民主ê實踐，需要體制內外ê衝突kah推撨，閣有長期ê練習kah毋著。自由kah民主化按怎來形成，閣kā啥款ê挑戰tsah來？