對第二次世界大戰煞鼓到解嚴進前，台灣捌行過一段tsiânn久長ê「兩爿對敵ê年代」。彼陣世界是美國kah蘇聯teh冷戰，閣有國民黨kah共產黨teh相戰ê範勢，國民黨就攑反共ê大旗，來動員台灣人民去抵抗外口ê共產對頭kah內底ê反叛者。仝時，政府kā憲政民主當做無存在，閣予tī台灣ê美軍享受特殊待遇，𧿬踏台灣人ê自由kah權益，金門kah馬祖ê人著愛不時活tī備戰ê狀態內面。國家隨時kā人點油做記號，kā敵我ê界線一刀切開，人民kah國家ê關係mā是弓甲絚絚，tsiânn緊張。兩爿ê對敵毋但是tī冷戰內面ê國民黨kah共產黨，mā予原底愛徛仝爿ê人民kah政府，成做相對扴(sio-tuì-ke̍h) ê兩爿。

8-1 冷戰時ê平常kah無常

戰地政務下跤ê金門kah馬祖

冷戰ê世界範勢，致使規个台灣社會大細項代誌lóng受著國家ê監視kah控制。蹛tī兩爿對敵ê前線ê金門kah馬祖ê人，閣較是感受著國家對𪜶日常生活ê影響有偌大偌深。

1949年國民黨kah共產黨分做兩爿，是國民黨tī國共ê戰爭中失敗，才徙來台灣。這款ê歷史因端，致使台灣、澎湖、金門、馬祖變成做(pìnn-tsiânn-tsò)一个政治共同體。國民黨kah共產黨做對頭、美國kah蘇聯相對扴ê範勢，致到金門kah馬祖徛臨戰場，毋但有時是無彈銃子ê「冷戰」，有時閣有銃子飛來飛去ê熱戰(jia̍t-tsián)，可比講tī 1949年ê古寧頭戰役、1954年到1955年中間ê九三砲戰，閣有1958年ê八二三砲戰。1956年ê時，國民黨政府tī金門kah馬祖欲實行「軍政一元、軍民一體」ê「戰地政務」，戰地政務委員會就成做兩粒離島上大ê政策決定機關，民政機關mā仝款愛予軍方插手來監督。軍事化管理kā社會弓甲tsiâsnn絚，致使經濟建設lóng著愛先考慮軍事ê問題，普通人ê平常生活mā隨時愛受著監督。

窮實，影響金門馬祖ê局勢ê毋但國民黨政府，隔一條烏水溝ê對面mā仝款攪擾著𪜶ê平常生活。學者宋怡明（Michael Szonyi）捌講，國民黨tī金門馬祖ê政策，實在是teh回應中國紛亂ê範勢。可比講1960年代，中國ê大躍進(Tuā-io̍k-tsìn)方針崩敗，國民黨就趁勢tī金門推捒「三民主義模範縣」計畫，就是為著欲做軍事動員kah政治ê宣傳；1968年，金門ê範勢閣再緊張起來，國民黨就實施戰鬥村計畫，kōo「人人是戰鬥員，村村是戰鬥堡」ê原則，欲來加強戰備kah民防ê工課。因為成做戰爭前線，金門kah馬祖ê「戰地政務制度」到甲1992年才擋恬，才thang解除戒嚴，行向民主。

冷戰時間，毋但是uì中國來ê軍事力量會影響著地方社會，斯當時ê台灣人，普通時仔mā tsiânn慣勢kah美軍接接(tsih-tsiap)，𪜶mā會kah在地人來往，有花開結子，mā有蔫花黃葉。

美國阿兵哥拄著台灣人

1956年4月，一个名號做米勒（William Miller）ê美軍，kah朋友去到台北市中山北路一段ê「薔薇酒吧」𨑨迌，米勒若像有相(siòng)著酒吧ê女服務生，就刁工去kā人詼(khue)，欲kā求愛，suah予對方捒開。心狂火著(to̍h) ê米勒suah kā人拖去後埕拍。了後，女服務生就去美軍顧問團kā米勒告，mā欲要求賠償。米勒有予美國來軍事審判，總是因為無適用tī中華民國ê法律，就免擔(tann)民事賠償ê責任。是按怎台灣有美軍駐守tī遮，𪜶suah毋免受本地法律ê制裁？

1950年，韓戰煏(piak)開，成做冷戰tī東亞ê起鼓，mā改變美國tī東亞政策上ê設局。為欲阻擋中共起兵𧿬踏台灣，閣欲予國民黨ê軍隊愈強，美國隨派軍事顧問團（Military Assistance Advisory Group，簡稱MAAG）來台灣，這thang講是美國反共戰策ê一部份。毋但日本、南韓、越南這幾个亞洲國家在內，tī歐洲kah非洲mā lóng有美軍顧問團ê跤跡。顧問團kā台灣軍隊鬥相共建立標準制度兼援助設備ê使用， mā kā美國款式ê軍事訓練引進入來。

1954年年底，台灣kah美國簽《中美共同防禦條約》，翻轉年，美國照條約來tī台灣來設立美國協防台灣司令部（United States Taiwan Defense Command，簡稱：USTDC）kah幾若位ê美軍基地。到kah 1979年，因為台美斷交，中美建交，顧問團kah軍隊才正式離開台灣。自彼陣了後，美國就改照《台灣關係法》行，若有需要才來提供軍事援助。

毋過，若照《中美關於美軍援顧問團來華換文》，美軍顧問團會得kah美國大使館受著仝款ê外交待遇。簽共同防禦條約了後，tī台灣ê美軍mā仝款有「司法豁免權(su-huat hat-bián-kuân)」。才致使講若是美軍tī台灣惹起ê案件，準是台灣人受害，mā tsiânn僫(oh)得著公正ê司法判決，頭前講著ê服務生就是一个例。閣一層愈出名ê，是發生tī 1957年ê「劉自然事件」。美軍顧問團ê雷諾受嫌疑講刣死陸軍兼革命實踐研究院學員ê劉自然，suah因為證據無夠就判伊無罪。這款無受在地法律規範ê權力，到kah 1965年兩爿簽訂《美軍在華地位協定》了後才算有受制限。

仝款tī 1965年，台灣同意tī越南ê美軍來台灣歇假ê計畫。越南ê美軍tī「歇喘恢復計畫」（Rest and Recuperation）中，會得tī亞洲歇睏5工，thang去台北、香港、新加坡、馬尼拉、曼谷𨑨迌。遮ê美軍坐泛美航空閣參考觀光紹介kah住所消費ê案內(àn-nāi)冊，欲來享受假期。毋過就若像王禎和小說內面講著ê「吧女速成班」，台灣ê生理人袂輸鯊魚鼻著血，隨蹽落去開酒吧、訓練女服務生講英語，欲趁勢趁美金。美金掠外，美軍來台灣這幾冬mā留落袂少半仿仔（puànn-hóng-á）ê囡仔。這寡囡仔身軀邊無老爸，閣kah一般ê台灣人生了無仝面，致使𪜶受著欺藐(khi-biáu)。1968年，賽珍珠基金會tī台灣設立分會，就是欲來協助這陣囡仔。

美援對普通人ê生活影響

冷戰期間，為欲阻擋共產勢力侵入台灣，美國毋但有軍事上ê相伨，經濟上mā援助。

美援對台灣影響有影tsiânn大，經濟建設、產業技術、公共衛生、文學藝術等，各方面lóng有。往陣ê研究捌講著美援ê影響有好有䆀，好ê是解決台灣ê經濟困難，台灣uì遮就lóng愛靠美國。這幾年ê研究是愈要意tī美國按怎來影響、改變台灣ê社會kah文化，閣有按怎改變一般人ê生活慣勢。

Tī公共衛生kah飲食(ím-si̍t)慣勢ê方面，mā看會著美國ê援助對台灣ê影響。1965年tī新莊ê樂生療養院捌發生一層罕得人知ê人體醫療實驗事件。美國海軍第二醫學研究所（U.S. Naval Medical Research Unit No. 2, NAMRU-2）提供試驗藥予樂生療養院ê醫生胡舜之，叫伊kā蹛tī療養院ê院民注射。予注射ê人身體suah出現無對同(tuì-tâng) ê症頭，逐家才做伙欲要求治療。這層代誌顯明樂生療養院成做美國ê藥物試驗場，國民黨是中間ê牽猴仔，全然無顧慮著院民ê醫療權益。

美援ê衛生政策有兩个方向，一个是愛「介入」ê大計畫，另外一个是公共衛生ê示範。頭前ê「介入」大計畫，是為欲解決較大項、嚴重ê公共衛生問題；公共衛生ê示範是欲起造一个標準見本，mā予醫療人員會當繼續學物件。尾仔去樂生療養院ê趙榮發醫師，就是捌接受這个計畫去到香港進修ê醫者。Ma-lá-lí-á（Malaria）計畫就是大計畫ê其中一項，雖罔台灣tī日本時代對ma-lá-lí-á ê預防kah治療已經tsiânn有定著ah，戰後台灣mā原仔綴世界衛生組織（WHO）ê「滅絕ma-lá-lí-á計畫」teh行，提美國予台灣ê新式蠓仔水DDT欲來毒(thāu)死蠓仔，ma-lá-lí-á就tī 1965年予人宣佈講滅絕ah。DDT是一款tsiânn俗ê殺蟲劑，對人較袂按怎，毋過對生態是tsiânn䆀，可比講kā貓仔毒死，suah顛倒鳥鼠四界湠。Tī 1971年衛生署成立進前，美國kah國際組織就用遮ê援助計畫，來牽挽台灣公共衛生ê方針，mā致使台灣ê醫療教育真緊就倚向美國ê款式。

毋但公共衛生這部份，普通人ê食食(tsia̍h-si̍t)起變化，mā kah美援有tsiânn牽連。台灣漢人社會原底主要是食飯，這幾冬來濟濟人顛倒愛食sán-tóo-it-tsih（Sandwich）、美國割包、意大利麵這款kōo麵粉做ê食物(tsia̍h-mi̍h)。學者劉志偉講，二次大戰以後，美國tshuā頭控制國際農業糧食制度，起造會得較利益美國麥仔ê市草kah環境。1954年是加踏一步，通過《農業貿易發展與協助法案》（480公法），欲用美援ê通路來外銷美國賣無完ê農產品。台灣ê農復會、美援會這寡kah美援有關係ê機關mā紲落推捒「麵食推廣運動」，宣傳麵粉製品ê好處kah製作方式。牛奶mā仝款，美國tī美援時期kā𪜶銷無完ê牛奶粉賣來台灣，加減影響著台灣人食牛奶ê慣勢。

若對國際外交ê角度來看，美國對台灣ê軍事kah經濟援助，suah造成美國kah台灣兩爿ê地位大精差。雖然美援是為欲保護台灣、改善台灣ê經濟，無疑悟suah顛倒予台灣愈來愈倚靠美國。猶閣tī社會文化ê層面mā仝款，無論台灣ê公共衛行kah醫療制度，抑是一般大眾ê食食習慣，到今原仔看會著美援ê影響。

8-2 姑不而將、走傱江湖ê時期

受規訓ê身軀：《違警罰法》kah校園ê髮禁

1960年代左右，捌有一陣穿白se-bí-looh、短頭毛ê查某囡仔，騎鐵馬tī台北大橋頭踅來踅去。𪜶13人結拜兼換帖，號做「橋頭十三太妹」，就是人teh講ê𨑨迌人（無正經頭路，食飽遛遛去ê人）。這陣人是穿插查埔款ê查某囡仔，人kā叫𪜶是「穿褲的(tshīng-khòo--ê)」，就若這久teh講ê生理女性同性戀ê中間較倚陽爿ê人。

受著異性戀ê婚姻俗慣影響，「穿褲的」ê戀愛lóng無蓋順序，𪜶無奈何(bô-ta-uâ)著愛kah女朋友分開，穿插kah模樣mā不時予警察注意。「十三太妹」內底ê蔡遠東，就捌穿查埔衫予人掠去警察局，kā伊講「查某囡仔著愛有查某囡仔款」（做個完完全全的女人）。

警察是根據《違警罰法》（1943-1991）掠蔡遠東ê，這條法律予警察有kā人掠、kā人關、kā人警告、kā人罰錢ê權力，司法機關袂得插手，當事人mā無才調thang用啥物法律來保護家己。因著《違警罰法》，警察會使掠「遊蕩無賴行跡不檢者、奇裝異服有礙風化者」。「遊蕩無賴行跡不檢者」包括三更半暝閣tī外口踅ê人、tī車頭過暝ê人；「奇裝異服有礙風化者」包括穿較少ê女性、喙鬚siunn長抑是頭鬃崁頭崁面若監囚(kann-siû) ê查埔lóng在內。台大教授王文興就捌予警察閘(tsa̍h)落來，罵伊傷風敗俗(siong-hong-pāi-sio̍k)，無資格做人ê老師，甚至強迫伊tī警察局剃頭。中學學生ê頭毛原仔受著制限，查埔囡仔干焦會使剃平頭，查某囡仔兩爿ê頭毛袂使留甲耳仔下跤超過1公分。教官不時手攑尺kah剃頭刀tī學校門跤口teh檢查，毋才平頭kah西瓜皮ê頭鬃成做斯當時學生囡仔ê記持。

Uì 1949年宣告戒嚴到1992年修《刑法》第100條進前ê這段期間，就是人teh講ê白色恐怖。國家kōo維持善良風俗ê名義來控制、管理代表主體ê身軀模樣。無自由ê身軀自然牽挽著頭殼內ê創意kah想像力，親像古井水干焦會略略仔起水泱(tsuí-iann)，一目𥍉隨消無去，袂得thang成做大湧。毋但控制人ê身軀，國民黨政府閣較是控制人民ê政治想法，禁止人聚集，閣限制講話ê自由。

受監禁ê思想：威權體制下ê壓迫kah反抗

1970年，tī台南ê美國新聞處發生爆炸，情報單位隨時發落處理，𪜶ê目標是成功大學化工系ê僑生(kiâu-sing)陳欽生。隔轉年ê 3月，陳欽生予情報人員諞(pián)上車，幾若日受著刑求。頭起先，陳欽生hông講是台南美國新聞處爆炸ê正犯(tsiànn-huān)，尾手是黨外運動者李敖等人來擔罪才煞尾。猶毋過，政府原仔毋承認是掠毋著人，閣改喙講陳欽生是「馬來亞共產黨拍派來台灣欲顛覆中華民國政府」ê人。翻轉年，陳欽生hông判徒刑愛關12冬。

Tī這款威權統治下跤，就算濟濟問題猶有斟酌ê空間，毋過tī學者ê研究mā講有22,028个政治受難者有kah陳欽生欲相仝ê經歷。是按怎有hiah濟政治受難者？國民黨是按怎閣欲做這款政治壓迫ê代誌leh？

1949年，中華民國走來台灣了後，蔣介石認為國民黨內部無仝心、規矩kah組織lóng崩敗，才會去輸予共產黨。毋才對1950年開始欲改造國民黨ê黨務，包括控制行政機關、立法機關、大專學校、軍隊kah警察。學者陳翠蓮講，這是kā國民黨kah中華民國縛鬥陣，成做一个真大ê黨國一體ê機器，政治上是黨來tshuā頭，經濟上是黨庫kah國庫相迵，分明是以政來飼黨。

宣佈戒嚴了後，政府隨發佈《懲治叛亂條例》kah《動員戡亂檢肅匪諜條例》。照《戒嚴法》，軍事機關會使審判特殊ê刑事案件；若是照《懲治叛亂條例》，犯著《刑法》內亂、外患罪ê人lóng愛刣頭；《動員戡亂檢肅匪諜條例》是予檢舉「匪諜(huí-tia̍p)」ê人有好空thang提，按呢來予普通人之間mā互相監督。政治氣氛真嚴肅，逐个人ê心肝頭lóng予人安一座「小警總」，毋敢烏白講話。

1955年，政府接紲成立國家安全局、指揮調查局、情報局、總政治部、憲兵司令部調查局、警備總部、警務處、外交部情報司、國民黨各工作會，總共8个情報機關，欲uì無仝角度kah層面來監視人民。1950年代，情報機關tsiânn緊就黜破中共ê地下組織，有人判死刑，mā有人為著性命，就配合情報機關來做伊ê工。

就算講政治氣氛弓甲tsiânn絚，原仔有人敢徛起起來反抗政府ê威權kah思想ê控制。《自由中國》雜誌掠民主自由ê精神來譬相(phì-siùnn)國民黨用特務控制人民、黨庫迵國庫，甚至敢罵蔣介石做總統做袂煞。雜誌負責人雷震閣招本省kah外省ê政治人物欲來組中國民主黨。總是，想欲組黨ê運動終其尾崩盤，雷震hông判關10年。雷震毋是孤鳥，uì 1960年代開始，就有人深感國民黨ê政治壓迫，致使發生袂少台灣獨立ê政治案件。1970年，tī台東ê國防部感訓監獄「泰源監獄」，政治犯江炳興、鄭金河眾人偷偷計畫搶武器、佔領監獄，大聲主張台灣獨立ê理想，落尾原仔無成。

原住民ê心聲：內山行政kah原住民少年人ê毋願

白色恐怖時期，毋但是有左派理想抑是主張台灣獨立ê漢人異議份子會受政治壓迫niâ，tī無仝時代lóng受著殖民、失去文化底蒂ê原住民族，mā仝款愛激恬恬。

1974年，Thāi-lóo-kooh族ê伊吉羅丹kah國校同窗杜文義tī麵擔仔食麵，suah袂記得紮錢袋仔，頭家報警講𪜶欲白食白啉，𪜶就按呢予人送去警察局。伊吉羅丹才到警察局niâ，隨發現講筆錄早就寫好勢ah，講伊欲組「台灣山地獨立運動組織」。而且毋但伊吉羅丹kah杜文義，閣有讀醫學院ê陳道明、實習醫師鄭榮祥、樂手秋賢嘉這寡原住民青年，因為寫幾若篇關心內山問題ê文章niâ，就予人講是宣傳內山欲獨立ê主張，就予人掠去櫳仔內。這寡受過教育、有智識ê原住民少年家，到底看著啥款ê社會現象，才會tī白色恐怖ê時代，來喝出𪜶ê毋願？

二次大戰了後，國民黨對內山ê政治方針接紲日本殖民者ê兩條統治線，kā平地囥入去普通ê行政區，內山囥tī特殊ê行政區。Uì 1951年開始，省政府推捒山地人民生活改進運動，講欲kā「山胞」牽教，予𪜶有公平ê地位，實在suah是欲來「同化」原住民。2冬後閣接紲推捒山地平地化ê政策，可比講tī教育方面予原住民ê升學有較優待ê制度。受這款教育ê原住民少年人，就成做原住民族內底ê「國語世代」。

原住民ê生活基礎kah平地ê資本主義經濟，關係是愈來愈峇，總是也致使𪜶失去土地、愈來愈散赤，閣著欠數食重利(tsia̍h tāng-lāi)。徙去蹛市內ê少年家閣會受著歧視；一寡女性予人掠去賣，逼去到煙花地；有寡囡仔是拄數變做囡仔工。政治受難者秋賢嘉捌發表〈一個山地人的心聲〉，哀訴「山地平地化政策」造成(tsō-tsiânn)買賣人口、囡仔拄數做囡仔工、姑娘仔被迫賣身ê情況，閣也講出原住民ê自卑kah受著汙名(ù-bîng) ê實狀。

8-3 外交崩盤，回轉(huê-tńg)現實

Siáng才是「中國」？兩个中國ê外交爭論

國共兩爿對敵ê範勢，毋但影響受國家支配ê台灣人ê普通生活，閣予逐个人著有疑問家己是啥物人ê問題。因為國民黨ê愛國教育kah宣傳，「中國」捌成做這粒島嶼內底上蓋主要ê身份認同。猶毋過，若是海峽兩爿lóng有一个「中國」ê時，siáng才是正港ê中國leh？

1950年代，國際奧委會（International Olympic
Committee, IOC）行兩爿lóng承認ê路，仝時間招中華民國kah中華人民共和國參加比賽。毋過兩爿suah lóng反對兩个中國ê政策，1952年Hē-luh-sin-ki（Helsinki）奧運kah 1956年ê Bi̍k-ní-pún（Melbourne）奧運，lóng干焦其中一爿參加。1958年，中華人民共和國規氣退出國際奧委會，6億ê中國人就按呢無法度參加奧運。1960年Lô-má（Roma）奧運，國際奧委會提出「實際控制ê體育領域」原則，要求台灣選手用「台灣」ê名參加，毋過國民黨suah講，無法度使用「中華民國」就是國家尊嚴hông蹧躂。

國民黨ê「漢賊不兩立」原則，毋但tī奧運ê比賽現出niâ，閣較要緊ê聯合國中國代表權問題mā是仝款。

中華民國是聯合國設立當初上早ê會員，閣是「安全理事會常任理事國」，毋過tī 1949年中華人民共和國建國了後，蘇聯隨講「著愛kā國民黨政府ê代表排除，kā中華人民共和國當做中國ê合法代表」。美國這爿講暫且，這个諍siáng是中國ê問題就延 (tshiân) leh無欲解決。尾仔suah閣kā「啥人代表中國」定論做「要緊問題」，欲kā中華人民共和國進入聯合國ê條件閣搝懸。

1955年，中華民國提蒙古是中國一部份做理由，反對蒙古入去聯合國。為著欲予蒙古入去聯合國，蘇聯mā用阻擋非洲Māu-lí-thah-nî-á（Mauritania）入聯來kah美國撨摵(tshiâu-tshik)。美國煩惱講會影響非洲國家伨中華民國ê態度，無定著閣致使中華民國hông趕出聯合國。為著按呢，美國有承諾會保障中華民國tī聯合國ê地位，毋過tī蒙古入聯投票ê時，叫中華民國莫出席、莫頓票。

另外一層外交大代誌tī 1964年來發生，斯當時法國總統Tē-gô-loh（Charles de Gaulle）決定欲kah中華人民共和國建交。總是，北京無滿意法國kah中華民國猶有交插，mā有料想著中華民國會主動斷交，才來接受法國欲建交ê提議。規欉好好，蔣介石政權因為「漢賊不兩立」ê原則，就kah法國斷交。法國ê外交方針變掛，致使法國進前殖民ê非洲國家mā綴行，剛果、中非共和國就按呢綴leh kah中華民國斷交。

1970年，Á-luh-pá-nî-á（Albania）欲予中華人民共和國來代表中國ê提案，強欲超過「要緊問題」提案著愛三分二會員國同意ê規定。美國政府想講欲提出「兩爿lóng代表中國」ê提案，按呢中華民國ê常任理事國ê地位才袂無去。猶毋過蔣介石講「寧為玉碎，不為瓦全」，無欲妥協。1971年ê聯合國大會，斯當時ê外交部長周書楷就宣讀退出聯合國ê聲明。終其尾，Á-luh-pá-nî-á ê提案是76票來通過，成做聯合國大會第2758決議。決議承認中華人民共和國是中國tī聯合國唯一ê代表，閣是5个常任理事國ê其中一个。毋過決議文干焦講定中國ê代表權niâ，無講著中國對台灣ê主權問題。

台灣tī外交崩盤，顛倒引起少年人來關心政治kah社會現實，致使𪜶著愛去思考台灣ê位置kah未來ê方向。

唱家己ê歌，寫本土ê文學

1970年3月初2 ，布袋戲藝師(gē-su)黃俊雄tī台灣電視台放送《雲州大儒俠》，隨放送就隨衝(tshìng)甲掠袂牢，甚至收視率懸到97％。Tī國民黨控制電視節目ê時代，台語節目一工放送ê時間袂使超過50％，台語布袋戲有thang hiah衝實在tsiânn無簡單。戲齣內底主角史豔文出場彼句「轟動武林、驚動萬教」，閣有對頭ê角色藏鏡人彼句「順我者昌、逆我者亡」，成做濟濟台灣人ê記持。戲齣內底流傳真闊ê台語歌曲，也暗藏對社會無公義ê怨慼。

掠布袋戲做例，顯明國民黨政權對台灣文化ê壓迫，總是mā予咱看著台灣文化tsiah-nī韌命。實際上，國際範勢ê變化，mā致使斯當時國家所主導ê文化體制受著挑戰。

1970年代寢頭，捌發生保釣運動(Pó-tiò ūn-tōng) kah退出聯合國ê事件，引起少年學生ê焦心(tsiau-sim)。社會學家蕭阿勤kā tī戰後出世、受著黨國教育，suah因為中華民國外交崩敗來關心政治kah社會問題ê彼陣人，號做「回轉現實」（huê-tńg hiān-si̍t／回歸現實）ê世代。

回轉現實世代ê作家，捌搜揣(tshiau-tshuē)
日本時代ê台灣新文學，想欲掠日本時代對抗帝國殖民ê精神，來對抗70年代猶原橫逆(huâinn-gi̍k) ê威權；𪜶mā欹(khia)現代主義文學ê空，寫有社會批判精神ê鄉土文學。𪜶kah頭前恬tsih-tsih、四界漂流(phiau-liû) ê世代無仝，欲徛tī中國民族主義ê位來對抗美國帝國主義ê文化，mā欲關心台灣ê鄉土。若是關心現實、回轉鄉土ê寫作，加減有左派ê氣味，致使受著另外一陣作家來憢疑kah指摘(tsí-tik)，咱tī鄉土文學論戰就看會著這寡討論。

1977年到1979年中間ê鄉土文學論戰，徛tī鄉土派ê陳映真、王拓、尉天驄kā台灣社會意識牽去中國民族主義，kā這兩項敆鬥陣，欲來kah控制思考、起造唯一價值觀ê國家文藝體制，閣有美國援助文藝體制所tshuā頭ê台灣文藝對削(tuì-siah)。反對鄉土派ê彭歌、余光中、朱西甯喝講「鄉土文學就是工農兵文學」、「鄉土文學會行去做𤲍狹(khueh-ue̍h) ê地方文學」。總是，相諍中國kah台灣民族主義問題ê時，鄉土派kah國民黨支持ê反對鄉土派其實無啥差別，鄉土派ê陳映真就講干焦有「tī台灣ê中國文學」，無「台灣文學」。若講台灣正經做主體，有台灣民族主義色彩ê台灣文學這款論述，著愛到甲美麗島事件了後才沓沓成立。

毋但文學，1974年修訂《出版法》，行政院新聞局出版品出版小組負責來查禁歌曲，若有kah「違反國策、為匪宣傳、意境晦淫、狠暴仇鬥、幽怨哀傷、文詞粗鄙」有關係ê，lóng會予人查禁。親像推捒民歌運動ê李雙澤，伊ê〈美麗島〉就予人講有台灣獨立ê氣味，袂使公開放送；李泰祥出名ê〈橄欖樹〉，因為歌詞有「不要問我從哪裡來，我的故鄉在遠方」，mā受禁止放送。

外交失敗予新世代作家回轉鄉土、走揣未來，總是，這寡想法若磕(kha̍p)著國民黨威權體制ê貓毛——無論左派抑獨派，lóng著受禁止。本土ê語言文化拄著國語政策是愈害，底蒂強欲剉甲齊(tsiâu)無去。

1970年代，外交失敗、少年人teh想現實政治kah社會問題ê時，台灣ê經濟仝這个時間是真快速teh發展，發展到會得排入去亞洲四小龍(sù-sió-liông) ê名單內。毋過tī經濟發展ê另外一爿面，suah也有料想袂到ê代價。

1973年9月初3早起，一隻民間ê渡船uì旗津欲駛去前鎮加工出口區，船途中suah來落難，25名ê搭客就按呢來過身。罹難者lóng是tī加工出口區食頭路ê獨身女性，甚至閣有猶未足16歲、為著厝內ê補所才假名來作穡ê查某囡仔工。

傳統漢人無允准獨身女性死去了後奉祀(hōng-sāi) tī厝內，家屬干焦照風俗另外起一間姑娘廟kā𪜶拜。25位女性ê墓，就仝齊揀tī旗津第二公墓彼搭、面對港區ê位所。2004年「高雄女性權益促進會」要求重起「淑女墓」，提醒著uì性別平等kah職業安全ê角度，來反省女性ê勞動問題。仝款彼年，高雄市政府就kā淑女墓改名做工殤紀念公園。2008年4月28 ê工殤日，就閣改名做「勞動女性紀念公園」。Kā「淑女」改做「勞動女性」，予人會當閣較注意女性工作者對經濟發展ê貢獻。

自從國民黨政府接收台灣，中央ê財政lóng紅字，閣國防ê支出mā是毋捌降低，致使台灣錢直直薄去。1950年代，因為有美國對台灣ê軍事kah經濟ê援助，台灣ê財政才沓沓徛較會在。毋過美援早慢會煞鼓，有國際合作總署中國分署kah佮美援會ê拍拚，行政院才來通過「十九點財經措施」，kā經濟管制放予冗(līng)，起造較利益民間企業發展ê環境。外資（尤其是愛出較濟人、開較濟氣力ê電子業）相(siòng)著台灣ê勞工價數俗足濟，就按呢倩(tshiànn)台灣勞工來做組裝ê工課。

Tī價數足俗ê勞工人口內底，女性ê比例是愈來愈懸，猶毋過斯當時ê產業環境猶lóng tsiânn歧視女性、看女性無目地(ba̍k-tē)。女性若是結婚、有身， tsiânn濟工廠就會kā辭頭路。頭前所講遐ê全全獨身女性ê勞工就是tī這款背景所來ê。

外資入來台灣確實有利益台灣ê經濟發展，猶毋過斯當時台灣政府原仔無要意職業安全kah環境汙染ê問題，毋才勞工受難ê悲劇會來發生。1972年生產電視ê美商飛歌公司，有女工致著怪病，甚至3个人過往。調查了才發見是化學藥水ê配方有毒。兩冬後，1974年內政部才公佈《勞工安全衛生法》、〈有機溶劑中毒預防規則〉這寡規定，thang減少工課傷害。話是按呢講，職業災害原仔不時都有。

1960、1970年代，台灣ê經濟有發展，kah美援會建議ê經濟政策有關係。猶毋過，tī經濟發展ê另外一爿面，勞工ê職業安全kah健康，閣有環境污染這寡問題，tī發生代誌進前，政府kah社會lóng無要意。到甲1980年代ê民主運動，民間ê組織較關心勞工權益、環境保護ê問題，才沓沓強迫政府愛面對經濟發展ê副作用。

二次大戰煞場，美國kah蘇聯ê冷戰、國民黨kah共產黨ê戰爭隨綴跤尾來。Tī太平洋西爿、徛倚中國ê台灣，姑不而將著愛絞入去這場戰爭。去殖民、去軍事化lóng猶袂赴市，國民黨政權隨閣來進行一擺殖民kah軍事化。美國為欲kā西爿ê太平洋顧予牢，kā台灣經濟ê大旗攑懸，kā美軍、美國援助ê物資、美國文化lóng送入來台灣，改變台灣人ê普通生活。

Tī國民黨ê威權統治下跤，「反共抗俄」、 「殺朱拔毛」ê標語tshāi tī眾人心肝頭；保密防諜、人人有責，這閣較是普通時ê任務，人ê身軀、思想、言論，lóng若像烏雲罩頂，不時hông監視，甚至變做家己心肝彼間「小警總」不時teh審查家己。雖罔講反抗ê聲音毋捌無去，總是也若狗吠火車，無才調去振動著這兩爿相對敵ê勢面。著愛等到1970年代中華民國外交脫箠、1980年代ê本土化、民主化ê大湧，國際範勢kah社會氣氛有改變，新ê可能才來起鼓。

‍