帝國主義
1867年4月18，美國駐廈門領事李仙得（Lí Sian-tik，Charles Le Gendre）來到台灣，準備去瑯嶠（Lông-kiau，這馬ê恆春半島），欲調查一个月前ê羅妹號（Lô-muē hō）事件；龜仔甪（Ku-á-lut，Koalut）社刣死杭妥船長（Hâng-thò，Hunt）kah 12个船員，mā著愛kā處罪。
李仙得欲來追究這層代誌ê責任，若照《天津條約》，大清政府ê台灣地方官應該kā支援。毋過官員suah轉喙(tńg-tshuì)，稱講羅妹號船員去予人刣死ê所在屬tī「生番(tshenn-huan)」ê地界，毋是清國ê領土，所以這層代誌無法度辦。
既然清國無欲治理這个所在，美國彼爿就直接出兵來攻龜仔甪社，結果去著著（tio̍h-tio̍h）原住民埋伏suah失敗。這層代誌拖tsiah久猶無thang解決，李仙得就改用外交手路去揣當地可能權力上大ê人，也就是瑯嶠下十八社ê頭目Tokitok，按算欲kah伊談判。
雙方品(phín)好勢，後過西方ê船難者若是來到南岬(Lâm-kak)海岸起岸，只要紅旗仔掛起來，十八社ê原住民就會好禮仔來對待。這歷史號做「南岬之盟」。南岬之盟這改對龜仔甪社毋是「責罪兇犯」，是干焦欲維持美方ê體面，Tokitok頭目ê地位mā顧有在。就按呢，羅妹號事件ê風波敢若暫時平靜ah。
是講，羅妹號事件，敢有影規个就是按呢niâ？
5-1 啥人ê牡丹社事件？
19世紀ê西方中心主義所致，李仙得kah tsiânn濟西方文獻teh記錄龜仔甪人ê行動，lóng kā寫甲tsiânn粗殘、野蠻。毋過，龜仔甪社生活徛起ê所在倚海，地理四周圍有大海，定著會去kah外來者互動。16世紀以來，西方海權聲勢愈大，各所在文化捷捷teh交流。一个好干證就是，龜仔甪社出土ê陪葬品，有西班牙ê錢幣(tsînn-pè)、日本ê瓷仔(huî-á)，lóng是外來ê物件。
有交流，就有衝突。英國人太羅（Thài-lô，George Taylor）捌tī南岬管理燈塔，根據伊ê記錄，龜仔甪人常在有teh講：大船便若來到地，就有一陣人馬來到庄仔頭刣人、搶劫閣強掠，查某人kah食ê物件lóng搶去𪜶船頂。這款ê故事，南岬ê各部落逐不時都發生。
按呢來看，羅妹號事件到底是行為野蠻、抑是欲保衛家園，今(tann)已經無thang了解ah。
毋過咱有thang看現現ê是，李仙得大駕光臨，表示西方新興帝國利用「文明」ê名義，靠勢伊資本tsiânn粗、軍事力量tsiânn強來到東亞。自按呢，台灣去予帝國拖來做競技場(kīng-ki-tiûnn)，文明kah野蠻欲tī遮拚輸贏。
毋是干焦按呢，羅妹號事件ê處置過程，干礙(kan-gāi)上大ê就是李仙得提出「番地無主」這个主張。伊ê作用，tī尾後ê「牡丹社事件」有thang看著。
「番地無主」這个理論ê源頭就是，大清帝國猶毋是現代國家，統治為著欲省力省本，tī伊領土ê一寡所在，統治權刁工保持予若有若無。彼當時，枋寮南爿閣落去lóng號做「番界」，無屬於清國正經有統治ê範圍。所致，規个恆春半島ê政治是由在各方勢力tī遮生存，包括車城ê福佬人、保力ê客人（kheh-lâng、客家人）、瑯嶠西南邊ê土生仔（thóo-senn-á，原漢中間所生ê囡仔），閣有瑯嶠東爿ê琅嶠下十八社。話講倒轉來，這十八社ê權力有起有落，瑯嶠下十八社頭目ê權力衰敗了後，南岬之盟隨就無thang約束ah。1872年李仙得改去日本做外交顧問，伊kā這套理論貢獻予彼當時急欲揣一个海外戰場ê明治政府，尾仔就引起牡丹社事件。
明治政府拄成立彼當陣，內外雙爿lóng有壓力。經過進前震蕩不安ê幕末時期，今有這个維新政權，欲來推動現代化改革。不而過，四民平等、廢藩置縣、廢刀令等等ê政策來到地，士族就失去較早ê特權。新ê時代，真濟武士人生茫茫渺渺，無thang好徛起。這號重大ê社會問題，新政權無趕緊處理袂使得。
毋過大久保利通(Tāi-kiú-pó Lī-thong)認為，若凊彩就去征韓，國內ê經濟kah改革會去予拖後跤，甚至有可能去惹著俄羅斯(Gô-lô-su)這寡強國來插手。面對這款時代背景，李仙得就kā日本政府建議，眼光會用得轉(tsuán)去台灣南爿盡尾ê原住民地區。1冬前，有54个琉球人tī八瑤灣（這馬ê滿洲鄉港仔這搭）去予人刣死。這个事件thang提來出兵，橫直這塊所在毋是屬於大清國，是無主之地。
1874年5月6日，西鄉從道(Se-hiong Tshiông-tō)領兵來到社寮（這馬ê車城鄉射寮村）起岸，前後來進攻牡丹社、女仍社、高士佛社，路尾靠勢伊人數kah武器占著大贏面，各社姑不將就向日軍投降。仝彼冬8月，清國kah日本開始談判。了後《中日北京專約》第一條，清廷就承認講日本這改軍事行動是「保民義舉」，這就表示清廷正式放棄家己對琉球ê宗主權。所以來到1879年，日本進一步kā琉球王國占起來，設立沖繩（Tshiong-sîng）縣。咱斟酌kā看，這回出兵台灣期間，有幾若个軍官日後就是殖民台灣ê大人物，包括樺山資紀(Huā-san Tsu-Kí)、兒玉源太郎(Jî-gio̍k Guân-thài-lông)、佐久間佐馬太(Tsò-kiú-kan Tsò-má-thài)等。也就是講，1874年這改出兵，日本毋但是頭一擺欲來試驗對外ê武力擴張(khok-tiong)，mā有拍一个基礎，另日thang來殖民統治。
若閣看翻頭，牡丹社事件毋是干焦武裝衝突，甚至有thang看著現代化過程中間ê文化衝突。日軍攻占牡丹社彼陣，捌掠著一个原住民少女，才12歲。隨軍ê日本記者kā伊叫做「阿台（オタイ）」。尾仔人kā阿台送去東京學日本話、日本文化，新聞有一站仔是真注目。毋過，少女接受「文明教化」6個月了後，人kā送轉去故鄉。族人對伊是tsiânn懷疑閣生份，閣常在tī日常生活kā排斥(pâi-thik)，伊心內鬱卒，路尾無偌久就自殺。
阿台ê悲劇，正正是具體來表現現代kah傳統中間ê矛盾(mâu-tún)。因為現代ê國家體系內面ê主權、領土kah人群，界線若無清楚是袂用得，其他ê文化mā袂用得去挑戰現代性。所致，無論是琉球人抑是台灣原住民，一旦去予現代ê國家秩序kā收入去，這寡族群就會受著真大ê「文明壓力」。逐家就愛硬練(ngē-liān)去學習、去接受殖民者起造ê制度kah價值；suah也tī這个社會實踐ê過程，流落(liû-lo̍h)去社會ê邊仔角。有同化、也有排斥，雙重力量teh作用，這就是現代性擴展無thang走避(tsáu-pī) ê悲劇。
關係牡丹社事件ê遺跡(uî-tsik)，比論講慰靈碑、紀念園區或者要塞(iàu-sài)城牆，若實地去探訪就知，彼大部份是日本人、清帝國kah國民政府來起ê。相對來講，琉球人kah台灣原住民，才是這層事件上直接有牽連ê群體，𪜶家己ê歷史證詞suah真罕得thang留落來。不而過，𪜶到今mā猶teh拍拚，想欲重新揣著家己ê觀察角度。
2023年，經過屏東縣政府、牡丹社族人去kah愛丁堡大學長期ê交涉，牡丹社勇士ê 4粒頭殼骨tī流浪150冬了後，總算轉來到故土。這幾粒頭殼骨，是按怎會走一逝遠路(hn̄g-lōo)去到地球ê對面爿？19世紀尾期，社會達爾文主義真時行，西方學者收集頭殼骨來測量，想欲uì遮來推論人種ê好䆀懸低。所致，這寡頭殼骨本底是日軍沙場ê戰利品，就一站過一站，尾仔成做一塊幼幼仔流落去帝國主義ê智識體系內底，予人囥tī現代ê學術機構。
如今，牡丹社勇士轉來到家己ê土地，以後就毋是冷淡凊面ê「研究見本」ah。牡丹社族人kā𪜶收起來，成做歷史記持kah族群ê敘事。這毋是kā物件還轉來niā-niā，這場正義行動ê象徵(siōng-ting)意義，就是失落真久ê聲音重新予人有thang聽見。
5-2帝國來到：交流kah撞突
清廷面對外來ê挑戰，姑不將就換別條路來試看覓，台灣就成做改革ê一个重點。牡丹社事件了後，清廷漸漸有智覺，台灣tī國防戰略這方面是tsiânn要緊，福建大臣沈葆楨(Sím Pó-tsing)等等前後來推動財政kah軍事改革，其中上重要ê是「開山撫番」，目的是欲加強台灣ê防禦(hông-gū)能力。
毋過，這寡改革措施(tshòo-si)拄著財政困難等等ê因素就斷站去，到甲劉銘傳(Lâu Bîng-thuân)出任巡撫，才閣有新ê改革。劉銘傳推動設防、練兵、清賦、撫番等等ê政策，欲愛台灣建省了後有thang建立海防kah財政自主。新式產業、交通kah教育等等ê領域，伊mā捌
去試看覓，包括建設鐵路、西學堂、煤物局等等。所致，有ê學者認為伊是台灣近代化ê開基者。
是講，劉銘傳ê改革，敢tsiânn實有kā台灣拍一个近代化ê基礎？咱uì照財政收入就知，改革前後雖然稅收有增加，毋過其中一半較濟是抽關稅kah阿片釐金(lî-kim)來ê，主要ê功勞是西洋人teh管理新式海關。閣再講，官員貪污、猶閣有生理人委員飽私囊(páu-su-lông)遮ê問題，劉銘傳終其尾無法度解決，毋才抾稅ê效率真䆀。就是有這寡弊病(pè-pīng)，致使繼任ê邵友濂(Siō Iú-liâm)就愛姑不將kā進前ê改革事業陸續停辦ah。
挽瓜揫藤(bán-kue-tshiû-tîn)論真講，劉銘傳毋捌脫離傳統ê政治框殼。Tsîng頭至尾，伊lóng利用較早ê官辦釐金局或者招商承包來徵收(ting-siu)稅金，身在其中ê官僚，就一直利用機會來家己賺食(tsuán-tsia̍h)。按呢來看，凡勢某一个程度來講，伊這寡改革是近代化ê試驗，毋過制度方面干焦tī傳統政治體制teh做內部ê調整，袂當kā看做欲轉到現代國家ê突破。
毋過，帝國主義一直伸跤出手，台灣已經沓沓仔kah全球體系牽連做伙，無thang閣再做清國壁角仔ê一塊孤島。
台灣來到世界舞台，拄開始人注目ê是伊ê經濟資源tsiânn豐富。尤其天然ê樟仔，獨獨是東亞ê亞熱帶區域才有，提伊來大量提煉做樟腦(tsiunn-ló)，這就是彼當時一个原料，thang製造重要ê人工化合物「賽璐珞」（sài-lōo-lo̍k，celluloid）。頭起先，清廷kā樟腦收歸官辦，毋過其中利益不止仔大，就常在有人走私，閣來清廷kah各國ê生理人就發生撞突(tōng-tu̍t)。1868年，駐香港ê英國艦隊(lām-tuī)，甚至派軍隊去砲擊安平，閣kā占領起來，欲逼清廷承認外商有特權tī台灣做樟腦ê買賣。劉銘傳捌想欲閣再實施樟腦專賣，毋過真濟外商來施壓，尾仔就準拄煞去。
也就是講，19世紀尾期ê台灣，漸漸kah全球貿易體系絞做伙，樟腦、茶米kah糖等等ê商品lóng大量出口。這一切ê來源，lóng是帝國主義來挵門，台灣才會得迵(thàng)去全世界。這扇大門毋但kā物質ê交流拍開，mā引進外來ê人群kah文化。彼个新時代，思想ê衝突kah交流融合(iông-ha̍p)，就有記錄留起來。
比如講，英國駐台領事斯溫豪（Su Un-hô，Robert Swinhoe），任職期間差不多台灣各地走透透，詳細調查地理、生物kah民俗現象。伊閣kā所見所聞紮轉去西方，寫做幾若篇學術文章，甚至捌舉辦小型ê「Formosa特展」。閣比如伊莉莎白．李庥（I-lī-sa-pe̍h Lí-hiu，Elizabeth Ritchie）kah翁婿做陣來台灣傳教，投入教育事工，特別重視庄跤女子ê教育。逐家認為𪜶是台灣女子教育ê先行者，閣促成頭一間女子學校——新樓女子學校（今仔日ê台南長榮女子中學，日本時代是私立台南長老教女學校）ê成立。
官員、傳教士、探險家kah學者所留落ê一寡記錄成做重要ê基礎，外界對Formosa就有thang去認捌kah想像。猶閣有，一寡自古毋捌ê智識kah思想，𪜶mā kā引來這塊島嶼，台灣社會ê面貌就按呢勻勻仔來起變化。
5-3 帝國建立新ê體制
話閣講倒轉來，這寡交流kah衝撞(tshiong-tōng)，毋是干焦文化kah思想層面才有niâ，伊背後猶閣暗藏(àm-tsông)帝國主義ê力量。新興帝國若像狂浪大湧一波一波來，古早ê體制終其尾是纘(tsàn)袂牢。這款ê壓力尾仔全面來爆發，1894年就發生甲午戰爭。日本kah清國來到戰場欲做一改拚輸贏，這就是時代交替ê界標(kài-phiau)。
開戰進前，逐家叫是清國ê軍事實力較贏日本。毋過，為著制度方面一寡較深ê問題，比論戰略kah後勤等等，清軍路尾是輸忝忝。Uì遮，無論是維新抑是革命，lóng thang知舊制度敢若已經到頭到尾ah。旭日(hio̍k-ji̍t)寬寬仔起來，欲來取代欲死盪幌(beh-sí-tōng-hàinn) ê青龍，台灣這塊坎坎坷坷(khám-khám-khia̍t-khia̍t) ê島嶼去搪著這號勢面，島民究竟有啥物款ê決定leh？
1895年5月29，日軍近衛師團tī鹽寮（現今ê貢寮區仁里里）上岸，連鞭就攻奪基隆。台灣民主國ê守軍袂堪得戰就敗了了去，總統唐景崧（Tn̂g Kíng-siông）走轉去清國內地，全島ê局勢不止仔震蕩(tsìn-tōng)。
Tī戰爭猶未平靜ê時，台灣人欲「順」欲「逆」一直掠袂定。台北城崩陷(pang-hām)甲無政府ah，紳士kah富商就出面來主持，決議欲予日軍入城來維持秩序；日軍落南ê過程，mā是搬仝一齣戲。便若有一个抗日勢力消滅去，在地ê紳士就會出來kah日軍轉踅(tńg-se̍h)推撨(tshui-tshiâu)，幫助這个地方恢復秩序。
毋過，原在有一部份ê台灣人決定欲抗日，背後種種ê原因 tsiânn複雜。有ê人是追求民族大義，對清廷盡忠。有ê人是局勢亂紛紛，想欲顧守本身ê利益。猶一寡人是為著日軍殘暴(tsân-pō)，單純想欲報冤仇。就是按呢，所謂「順」、 「逆」ê立場就無可能牢(tiâu) tī遐無改變。以抗日頭目簡大獅（Kán Tāi-sai）做例，伊兵敗了後覕tī北部山區，kā庄頭抽「保庄費」來維持(î-tshî)生路。總督府半硬軟(puànn-ngē-nńg)，伊就有一站仔來歸順。毋過，伊又閣煩惱家己ê財產家伙去予人清算，無偌久就以「反日復清」做號令來重再起事，結局又閣失敗。
帝國對原住民仝款有衝擊，彼个影響是猶閣較大。頭先，總督府是成立撫墾署，推行較溫和好禮ê政策，欲kah各地原住民部落來跋感情，閣由在𪜶保持相當程度ê自主性。毋過紲來，日本帝國對台灣北部ê山林資源——尤其hi-nóo-khih（檜木） kah樟仔——興趣是愈來愈大，就開始強迫大甲溪以北ê原住民，看是欲歸順抑是搬徙去別位，為著這，就發生真濟武裝衝突。日本當然是有現代化ê武器kah久長ê理番政策，毋過山林戰事想欲占贏，猶是tsiânn硬篤(ngē-táu)，無才調隨kā北部山區收起來實際統治。尾仔勢面猶閣較害，日本人踏入山區了後，一寡外面ê病症mā綴teh來。1918至1920年期間，北部ê原住民部落有西班牙流感（Spanish flu）大爆發，死真濟人。終其尾是原住民漸漸無能力thang反抗，姑不將就愛順服日本帝國。
北部是衝突激烈，另外一方面，總督府對台灣南部是一直採用溫和好禮ê政策，久來，在地ê原住民族就沓沓會接受日本ê統治。日本ê理蕃政策「北剿南撫(pak tsâu lâm hú)」，到甲1920年代初期，就有thang實際掌握全島山地，原住民族規个就予收入去帝國ê統治體系。
政權來來去去ê年代，島民逐个都根據本身ê價值kah處境，隨人做出選擇。各人ê行動無仝途，所致面對現代國家帶來ê壓力，台灣人ê反應毋才有tsiah-nī濟款式。
5-4 帝國權力ê規訓
台灣是日本經過戰爭來提著ê頭一塊海外ê領土，毋過，日本政府早期ê統治方針一直掠袂定。彼當陣主要有3款想法：頭一款是「台灣住民放逐(hòng-tio̍k)論」，欲kā本島ê漢民族lóng趕出去，予日本人大量徙入來。第二是「內地化論」，認為應該漸漸來同化台灣住民；猶未完全kā同化進前，先施行「內地法」kah「特殊殖民地法」。第三，「英國式殖民地政策」，kā台灣當做殖民地，尊重伊自早ê慣俗，閣建立殖民地專屬ê行政kah立法機構。路尾，日本政府kā內地論、殖民地論這2款性質綜合起來，確定台灣ê「總督府官制」，規定台灣總督著愛予武官擔任，閣享有(hiáng-iú)殖民地立法權（就是「六三法」），而且受著拓殖務省(Thok-si̍t-bū-síng)來監督。
不而過，準講軍政慢慢仔過渡來到民政，台灣ê抗日運動原在起起落落。1896年6月，日本守備隊來到雲林，以「剿匪(tsâu-huí)」ê名義刣死平民數千人。總督府武官派「放逐論」ê態度無teh驚人知，住民ê生命財產全然無囥在眼內。事件發生，全國規个譁(huā)起來。其中，台灣高等法院ê院長高野孟矩（Ko-iá Bīng-kí）ê批評上蓋尖利(tsiam-lāi)。伊堅持法治主義ê理念，對總督府ê政策kah統治構想攻擊甲不止仔嚴正。毋過，陸軍為著欲反制高野kah𪜶法官集團，路尾就kā伊罷免。
代誌到遮來，毋是干焦台灣統治ê問題，問題已經升級來到違憲，牽連著中央ê政局。彼陣各黨派千算萬算，路尾手，內閣就倒擔(tó-tànn) ah。這當時，日本治台ê方針猶原是亂紛紛，一直到後藤新平（Hōo-tîng Sin-pîng）出任民政長官，才漸漸徛有在。後藤新平認為統治若欲安定，尊重古早ê慣俗是唯一關鍵。伊閣強調總督府袂用得受母國來干涉，著愛自主施政。以殖民地論做中心ê統治方向，自按呢就有定著ah。
咱會用得講，台灣ê統治方針，是tī台灣島內kah日本中央各派ê勢力teh搝搝搦搦(khiú-khiú-la̍k-la̍k) ê中間，才慢慢仔撨出來ê定論。方針有定論，閣一步一步來落實。日本ê殖民統治毋但是tī物質方面有建設，閣透過現代國家ê制度，𪐞(tòo)入去到島民逐个ê日常生活當中。
日本tī台灣建立ê統治機構，咱kā看，thang講台灣有影是正範(tsiànn-pān) ê「官僚王國」。統治初期，總督府ê職員總算起來猶無到5千人；毋過1910年代，人數已經漲(tiòng)到2萬以上。是講，這官僚組織tsiah-nī大，台灣人suah干焦占2.5％，而且lóng是低層ê職員。若日本tī朝鮮就全然無仝款，任用朝鮮人做地方官員是真濟。官僚機構tsiah大篷(phâng)，從屬(tsiông-sio̍k)主義ê作風就真明顯。行政官員一概受著頂層機關來指揮kah監督，就按呢，法律kah命令有thang由懸至低來透流(thàu-lâu)到基層。閣有，總督府tī地方有嚴密ê警察系統，配合保甲制度，授權予警察鬥處理地方ê大細項事務，比如戶籍、犯罪、抾稅等等。
若原住民ê生活區域，是閣較進一步予規劃做「特別行政區」。總督府tī山區ê警察統治若像天羅地網，比平地閣較嚴密，駐在所（偏僻地區ê警察單位）逐四界都有。毋但教育、醫療、經濟，甚至是武力ê動員，警察lóng有權來指揮。可見日本帝國踏入現代化，一方面靠勢伊武力有夠強，反抗者一概酷刑(khok-hîng)來壓制；另外一方面，社會基層ê日常生活，伊mā彎空斡縫(uan-khang uat-phāng)全面teh監控。到這个時陣，uì山到海這中間，規个lóng是現代國家權力體系ê空間，島民逐个都走袂去。
規个社會去予總督府控制，經濟結構mā綴teh起變化。較早一句俗語：「第一戇，種甘蔗予會社磅」，就是台灣蔗農去予大型製糖會社刻剝 (khik-pak) ê心聲，閣有thang看出島嶼ê命運是按怎去予殖民經濟來改變。日本工業化了後，產業漸漸搦(la̍k) tī三菱、三井這寡財閥ê手頭，台灣mā去予這套資本主義體系收起來。總督府推行貨幣(huè-pè)、金融kah土地改革政策，其中土地調查尤其是關鍵。
清代以來ê小農經濟是一直tsiânn興旺，這套政策順應慣俗，真濟租戶有thang轉做業主，按呢台灣就有私有財產制度。毋過，這尾仔mā造成土地愈分愈細塊。
日本ê糖業資本家來到台灣，雖然伊資金是贏人真濟，欲買大片土地來種甘蔗suah無法度。台灣農民大部份是土地無愛賣人，所致，有警察甚至來姑情(koo-tsiânn)或者強迫賣地。路尾，製糖會社姑不將就改換手路，kā原料流通獨占起來。1905年，總督府推行「原料採取區域制」，全台ê農耕地kah農戶，差不多lóng是新式ê製糖會社搦牢牢。這種資本主義ê生產模式，是欲對應台灣較古早ê經濟；毋過，這mā成做一个因端，到甲1920年代就有「米糖相剋」ê矛盾來發生。
這就是講，日本帝國雖然有引進經濟現代化，毋過某一个程度，伊mā著愛順應自早ê經濟模式，因為按呢，才造成(tsō-tsiânn)台灣ê資本主義化ê過程有較特別。
5-5 帝國引進ê新智識體系
帝國來到遮，科學kah智識mā順紲過來。初初kā看，文明敢若有進步，毋過問題是：這寡智識到底屬於啥物人？
拄開始統治台灣，總督府就落手來建立醫療kah公共衛生體系。1897年，總督府tī台北病院設一間「醫學講習所」，招收頭一屆ê醫學生，1899年升格做「台灣總督府醫學校」。1909年閣成立「總督府研究所」，下面設一个衛生學部門，尾後徙去台北帝國大學，專門研究熱帶醫學。猶閣有，總督府mā頒布幾若項醫療法令，設幾若間病院，mā有推動水道水(tsuí-tō-tsuí)、下水道(hā-tsuí-tō) kah垃圾物(lah-sap-mi̍h) ê處理設施等等，這lóng是關係環境ê公共建設。整體來講，台灣ê醫療衛生環境改善真濟。
是講，這寡措施mā毋是純然出tī「醫療現代化」ê考慮，閣也受著性別、種族、階級kah治理能力等等ê因素所牽連。以總督府ê性病政策做例，殖民初期，民政局長水野遵(Tsuí-iá Tsun)推行私娼檢疫(su-tshiong kiám-i̍k)政策，目的是欲保護駐台ê日本男性軍民ê健康。政策強制檢疫，對象lóng是日籍私娼，無包括台籍私娼。這是因為總督府認為，梅毒是境外ê病症，而且台籍私娼來來去去，欲kā包括入來檢疫無hiah簡單。結果，日籍私娼著愛「逐日接客、逐週體檢」，這號醫療規訓(kui-hùn)是並(phīng)殖民地ê女性閣較嚴。猶毋過，這个政策實行無偌久就廢除ah。政策會倒翻頭，可能是因為地方ê衛生治理tsiânn硬篤，毋才造成所謂ê「台灣私娼防治25冬閬站期」。也就是講，為著欲保護日本軍隊ê男性，女性著愛捷捷接受醫療控制；毋過總督府治理能力又閣無夠，早前台籍私娼就先排除檢疫，尾仔規氣全部ê私娼lóng總kā放棄ah。
醫療以外，總督府閣骨力推動新式教育來培養殖民地ê人民，實學kah國民性格lóng愛齊全。1898年，總督府頒布《台灣公學校規則》，要求學生毋但愛有基本ê讀寫能力，mā著愛培養強健ê體魄(thé-phik) kah國民精神。無偌久，台灣社會就了解著教育是改變階級地位ê一條新路，tsiânn濟所在就相爭欲設公學校。毋過總督府是真知影毋通予殖民地ê人民接受siunn濟教育，才袂去刺激𪜶產生政治覺醒。所致，課程一直lóng無超過「國語」kah「實業」ê範圍。公學校閣起去，mā干焦有醫學校kah國語學校有thang好升學。這寡進階ê教育，仝款是為著欲滿足殖民統治ê人才需求。
殖民初期ê教育體系，伊ê根底是欲培養「新人種」來配合殖民統治，帝國對台灣ê統治才會愈𠕇篤(tīng-tauh)，毋是tsiânn實欲追求教育ê現代化。
日本帝國閣毋是干焦引進現代化ê智識，𪜶閣創造新ê智識。西方ê調查統計制度，日本kā引入來，閣設立「台灣統計協會」等等專業ê社群。遮ê調查uì戶口、土地、舊慣、農業kah工業等等各方面lóng有。調查ê成果tsiânn重要，lóng成做紲來欲做政策ê規劃、效果ê評估會當參考ê資訊。有遮ê調查，帝國對殖民地ê控制，無形中又閣進一步去。
統計數據掠外，真濟日本探險家kah學者是雙跤踏實地，親身到本島來做田野調查。比論講伊能嘉矩(I-lîng Ka-kí)就利用真大量ê田野調查，徛tī人類學ê角度來對台灣ê原住民族重新分類，推翻(thui-huan)過去干焦會曉粗分做「生番」、「熟番」ê方式。閣可比講總督府主持ê植物(si̍t-bu̍t)調查，由川上瀧彌(Tshuan-siōng Liông-mí)等技師來規劃，標本經過篩選(thai-suán)、號名kah出版，頭一步來建立台灣植物ê智識系統，猶閣出版《台灣植物目錄》等等ê系統成果。遮ê調查成果早就超過實用ê坎站，伊mā有政治象徵、殖民地治理、科學智識等等幾若方面ê意義。
這是帝國稱霸ê時代！帝國靠勢伊武力有夠強、閣資本獨占，東亞ê大門就按呢去予挵開。現代化若像捲螺仔旋(kńg-lê-á-tsn̄g)，台灣無thang走閃，mā著綴teh紡(pháng)起來。
來到傳統kah現代欲轉踅ê路關，毋但是國家著愛接應挑戰，逐个人mā著面對本身ê利益、文化kah權力結構等等，家己來做決定。就是按呢，咱常在看著這个時代有伊矛盾ê所在：初看是文明，suah原在野蠻；初看是理性，suah原在倚靠本能；初看是現代，suah原在予傳統縛牢牢。
台灣有現代國家ê框殼，毋過就是這寡千枝萬葉(tshing-ki bān-hio̍h) ê矛盾，才造就伊ê面貌，閣對以後歷史ê行向有tsiânn大ê干礙。
