海、島、人
台灣史絕對毋但4百冬，tī 3萬年前，早就有人tī台灣這塊土地teh生活ah。
這是tī無字thang記ê「史前時代」，干焦會當靠考古學家去掘埋tī塗裡ê物件kah相關ê線索，去了解彼當陣ê人ê生活kah文化。
台灣這座島嶼是地球板塊運動所形成ê，一直到今，台灣ê形狀kah範圍猶原閣teh改變。2萬7千年前是最後一改ê冰河期，彼時，全世界ê海水消退去了後，土地ê面積是比這馬濟閣較濟。彼當陣ê台灣毋是孤一塊ê島嶼，是敆倚tī東亞大陸。
1-1 海水退去了後：舊石器時代
1970年代，tī左鎮有去挖著幾塊仔頭殼碗，經過台日學者共同合作鑑定了後，確定是咱人類ê頭殼碗。用彼時檢驗ê方式來看，遮ê頭殼碗可能是3萬年前至2萬年前ê物件，uì遮，咱kā「左鎮人」看做是台灣上早出現ê人類。一直到2013年，考古學者kā左鎮人ê頭殼碗送去美國hām澳洲ê實驗室，用精密ê「碳十四」定年方法來鑑定年代，結果是講遮ê頭殼碗離這馬干焦經過3千冬，證明講早前ê檢驗結果有重耽(tîng-tânn)。
俗稱「烏水溝」ê澎湖水道，是另外一个有發見化石ê重要地點，遮ê化石通常是漁民teh掠魚ê時，順紲uì海底撈(hôo)起來ê。澎湖水道捌去撈著古菱齒象、梅氏四不像、德氏水牛等這款tī冰河期大型動物ê化石，這就表示講tī冰河期ê時，台灣海峽遮是土地，動物會當tī遮自由來遷徙kah活動。
2015年1月27，有一項重要ê研究發表：科學家kā一塊uì澎湖水道海底撈起來ê人類正爿牙槽骨化石分析了後，初步判斷講是更新世中期ê直立人種，就kā號做「澎湖原人」。仝彼沿ê較有名ê古人類，猶閣有北京人、爪哇人等。Uì研究來推測，澎湖原人ê身懸量其約是160公分、體重差不多是60公斤，看袂出來是查埔抑是查某。
利用新ê科學分析技術，2025年，國際頂尖期刊《Science》閣有刊一篇有關澎湖原人上新ê研究成果。研究團隊用「古蛋白質序列分析」（Palaeoproteomics）ê方法，確定澎湖原人其實是一个「丹尼索瓦人（Denisovans）」ê男性。丹尼索瓦人是已經滅亡去ê古人類，生活tī差不多38萬年至5萬年前ê亞洲北部，這个tī台灣所發現ê丹尼索瓦人化石，毋但kā丹尼索瓦人ê活動地界楦閣較南爿去，mā顯示古人類teh演化kah遷徙路線ê複雜性。
目今，東亞地區對直立人kah丹尼索瓦人ê了解猶是tsiânn有限，猶袂完全清楚𪜶tī演化上ê牽連，著愛等待演化過程當中彼个「拍交落去ê連結」（the missing link）ê出現。「拍交落去ê連結」就是講生物tī演化ê過程當中，猶袂予人發見ê過渡型化石。
毋但澎湖水道niâ，台灣東部地區也捌出現古早人類ê生活地點。台灣東部因為是板塊kah板塊相𤲍kah真激烈，予地勢直直衝(tshìng)懸、山勢就直接面對太平洋ê這款特殊地形。數萬年來，海湧直直kā山壁蝕落去，成做一个閣一个相敆相接ê海蝕洞。遮ê天然磅空，毋但會當遮風覕雨，又閣近倚海墘，有豐富ê天然資源，就成做舊石器時代ê人上蓋理想ê徛家。內底上蓋有代表性ê，就是台東縣長濱鄉北端ê水母丁山，也就是今仔日所講ê「八仙洞」。
1968年，考古學者頭一擺tī八仙洞採掘ê時，發現遺址內底干焦有石器niâ，無揣著有粗瓷仔器具ê文化層。遮所掘著ê物件有影足古早，予人認定是台灣上蓋早ê舊石器時代文化之一，就號做「長濱文化」。
尾手經過調查研究了，發見講tī這四箍圍仔lóng總有30外搭ê磅空kah石頭蔭ê所在。考古人員tī海拔超過180公尺ê磅空內底，向下跤挖到差不多6.5公尺深ê所在，發現有保存甲tsiânn好勢ê生活遺跡，經過碳十四定年法ê測試，伊ê年代會當牽去到3萬冬前。這項發現，證明彼當陣ê人已經tī台灣東岸teh生活ah。
Uì長濱文化所出土ê石核器、石片器kah石英質小石器等所拍ê石器來看，長濱人是靠拍獵kah採集teh生活ê，猶袂有發展出農業、牧場抑是做粗瓷ê技術，遮ê物件lóng予咱看著早期ê台灣島人，𪜶ê生活方式kah文化面貌。像這款ê舊石器文化遺跡，tī北部猶閣有南爿ê墾丁鵝鑾鼻地區mā lóng有發現。
1-2 南島語族tī台灣：新石器時代早期
美國ê生物地理學家Jared Mason Diamond捌用「台灣予世界ê禮物」（Taiwan’s Gift to the World）來形容台灣tī南島語族文化當中ê地位，呵咾這座島嶼晟出tsiah-nī濟款、又閣豐富ê南島語言kah文化。南島語族分佈ê範圍有影是不止仔闊，uì上北爿ê台灣，往西湠去到非洲東海岸ê馬達加斯加，向南會當到紐西蘭，往東到復活節島lóng包括在內。踮這片闊莽莽ê海洋世界內底，tī遮生活ê人，有上出擢ê行船技術，豐富ê口傳故事是𪜶ê傳統，猶閣有tsiah-nī濟款無仝ê語言，遮ê語言就統稱做「南島語系」。
根據考古學ê研究，tī規个南島語族分佈ê範圍內底，咱台灣有上蓋早期ê新石器時代文化。若是根據「台灣起源說」來看，早期ê南島語族人有可能是按台灣起行，一步仔一步駛船落南，遷徙去菲律賓、印尼、馬來西亞等地，才閣進一步徙去到太平洋kah印度洋ê各大島嶼（澳洲無在內）。雖罔「南島語族」這个詞是對語言學來ê，猶毋過語言學kah考古學所研究出來ê，suah是指對仝款ê結論去——台灣tī南島語族ê發展史內底，是徛tī tsiânn關鍵ê地位。
台灣上古早新石器時代ê遺址，是tī新北市ê「大坌坑遺址」，tī遮有發現刻巡kah頓索仔跡ê粗瓷仔，猶閣有用石仔做ê做木工具、銃頭等這款磨過ê石器，遮ê文物毋但是人類ê製作技術kah生活方式ê見本niâ，mā成做是早期文化ê重要代表。
考古ê研究愈來愈深入，學者閣tī台灣各地相連紲發見kah「大坌坑文化」仝箍仔ê遺址。其中，tī台南ê南科地區所發現ê是特別關鍵ê證據。現此時ê南科園區離海是不止仔遠，毋過遮略約tī 6千年前猶閣是tī海裡，一直到差不多離現此時5千年前，因為地殼衝懸kah海水退去了後，才對水底浮出來，成做一塊適合人來蹛ê土地。紲來遮就有部落ah，就是所號名ê「南關里東遺址」。
南關里東遺址tī 4800年前是一个tsiânn興旺ê史前部落，tī遺址內底有發見tsiânn濟碳化ê粟仔kah秮仔(tai-á)，表示講彼當陣ê人，已經有一定程度ê農業技術。Tī墓壙內底有挖著用魚骨、魚喙齒kah螺仔殼所做ê裝娗物，猶閣有uì火烌坑（古早ê糞堆）挖出來ê各類螺仔殼、魚骨kah魚耳石仔，遮ê物件，lóng看會出來𪜶是靠海teh食穿。
毋但按呢，tī有索仔樣ê粗瓷仔罐墘抑是頂半橛，捷看會著用代表海湧、溪流kah山脈ê線圖來裝娗，表示彼時ê人已開始用藝術ê手路來表達對自然環境ê觀察kah想像。Tī遺址內底，考古學者猶閣有發見埋甲tsiânn好勢ê狗仔，這mā表示狗仔已經是人類ê生活當中tsiânn親、tsiânn重要ê伴ah。
冰河期結束了後，海水衝(tshìng)懸，kā土地淹了了，台灣閣再變做獨立ê島嶼。到甲新石器時代了後，若是欲來台灣，定著愛「渡海」才有法度到。就算講到今猶袂有直接ê證據來證明新石器時代ê人會曉行船，猶毋過tī台灣西南部所出土、用七美島ê玄武岩所製作ê石器，猶閣有tī澎湖所發現、uì花蓮來ê台灣玉，lóng予咱譜譜仔知影彼當陣ê人已經有渡海遷徙kah貿易ê能力，mā有才調來克服澎湖水道——也就是俗稱ê「烏水溝」這跡ê危險。
新石器時代早期ê遺址差不多lóng tī沿海發現ê，毋過，過無偌久，tī台灣ê內山斗底、甚至懸山地區mā有看著人類活動ê痕跡。這就表示史前ê這陣人，毋但tsiânn緊就適應變化萬千ê地形環境，生活型態mā來改變ah——uì倚靠海洋資源一步仔一步轉做以農業kah山林資源為主ê生活方式。
考古學者陳有貝認為，過去咱lóng感覺台灣上早期ê先祖是uì無仝ê所在、無仝ê時間來台灣ê，毋才島裡會出現各種無仝ê族群。總是，tī島外其他ê所在，呔會毋捌去揣著kah台灣欲相𫝛ê原住民族群？所以陳有貝教授認為，彼是本底慣勢海洋生活ê南島語族來台灣了後，去受著台灣島闊閣大ê山林環境來牽教，才變做是適應山林、燒山種作ê農民。遮ê人群kah文化，「干焦入，無teh出」，終其尾就踮台灣島晟出有家己ê特色、無仝族群ê原住民。這款見解，對久長以來「台灣是南島語族ê起源地」這个主流假說提出挑戰，而且kā台灣環境ê多樣貌、地形複雜所形成ê文化獨特性，予人看閣較清楚——一款干焦屬tī這座島嶼ê族群款勢kah歷史痕跡。
1-3 豐富多元ê部落文化kah信仰：新石器時代尾期
到新石器時代ê中期，台灣北部、中部、南部kah東部ê史前人群，已經發展出無仝ê物質文化款勢，表現出tsiânn顯目ê區域特色。到甲新石器時代尾期，文化型態是更加濟款，各地lóng有挖著用花蓮特有ê「台灣玉」所製作ê玉器，表示講彼當陣tī島內各族群之間，已經有捷teh往來kah交流ah。
Tī大台北地區ê圓山遺址（mā號做圓山貝塚），考古學者tī離這馬大概3千7百年進前ê文化層（tī人類活動所留落ê物件、古蹟kah其他事物層層疊疊所緟起來ê塗層），有發現新ê技術工藝佮物質文化。「有段石錛」kah「有肩石斧」是圓山文化內底tsiânn有代表性ê家私，這兩款家私干焦出現tī圓山文化仝沿ê分佈地區，其他所在是tsiânn罕得看會著，這顯示彼當時技術改革ê成果，mā反應出族群之間共同ê生活方式kah文化認同。
圓山文化teh做粗瓷仔ê技術是不止仔出擢。粗瓷仔ê外口面定定會糊紅色ê塗，tī耳仔抑是蓋ê內底面，會kā鑿密密ê一點一點來做花樣，而且猶閣有外形tsiânn特別ê雙口罐等這款ê形體，看會出來這个文化無論是審美抑是工藝lóng tsiânn有創意。
因為圓山文化這款風格ê器具，tī台灣早期ê史前文化當中毋捌看過，考古學者多數是認為講：遮ê新元素有可能對外地來ê，表示tī新石器時代尾期，有島外ê移民遷徙來台灣。是講，圓山文化ê這陣人，mā有來提花蓮出產ê台灣玉來做妝娗物，表示𪜶毋但kah島外ê人交流，mā tī台灣島四界行透透，kah無仝所在ê族群互相交流，不時有teh聯絡。
圓山文化予人認為講有去透著外來ê文化元素，若台東ê卑南遺址就kah圓山文化無仝ah，伊所展現ê是在地ê特色，發展出有家己特色ê史前部落。
差不多tī 5千年前，卑南遺址就已經有先民teh蹛ah，猶閣伊tī大概3千7百年前就發展出大型ê部落。彼時ê人會kā厝一間仔一間、密密來起做伙，成做是向東北爿ê都蘭山、整齊排列ê、長株形ê部落。卑南遺址遮ê人猶會替往生ê親人，用石板去做合軀(ha̍h-su) ê石板棺，閣會kā埋tī徛家西爿ê田內底。石板棺所用ê板岩，愛uì數十公里外ê中央山脈搬來，有一寡厝內底，甚至會tshāi超過4公尺懸ê石柱，彼當陣𪜶是按怎去完成tsiah-nī不可思議ê工課leh？有影予咱想袂到。
Tī 1980年，為著欲起環島鐵路kah台東車站，卑南遺址遮有發動彼時全台灣上蓋大規模ê搶救出土活動。經過10冬ê時間，挖出上無1523具ê石板棺kah數千件ê史前玉器，是目前全國孤一搭考古遺址出土玉器上蓋濟ê所在，所致，國立台灣史前文化博物館會就設tī遮。
卑南遺址ê玉器齊是用花蓮豐田這搭所產ê台灣玉所製造ê，豐田離卑南遺址有超過130公里。就算tī花蓮mā有tsiânn濟玉器出土ê遺址，suah是kah卑南玉器ê風格精差蓋大，而且tī這兩所在ê中間，lóng毋捌看著其他有出大量玉器ê遺跡。所致，推論講tī卑南史前ê人，tsiânn有可能是直接uì產地提著玉礦，家己做出𪜶所佮意ê風格。按遮來看就知影，彼時卑南遮ê人，毋但經濟穩定、生活富裕、人有夠額，猶有才調去hiah遠ê產地提著重要ê資源，閣有夠人會當去搬hiah濟板岩來起厝kah做石板棺。
2013年，有學者用植物矽酸體來分析卑南遺址，kā「台灣原住民是種秮仔為主」ê傳統觀點翻案去。研究發現，卑南部落主要是種粟仔，閣產量tsiânn穩定，是予卑南文化會hiah興旺上主要ê經濟來源。這毋但證明台灣東部tī新石器時代就是tsiânn重要ê粟倉，mā看會著彼當陣所種ê是較粒ê在來米種，毋是一般所想較黏ê、像這馬ê蓬來米種。一直到差不多2千9百年前，氣候直直teh改變，才予稻仔ê收成愈來愈䆀，卑南文化mā才沓沓仔覕爍(bih-sih)去。
卑南文化掠外，tī台灣東海岸猶閣有出現另外一群人，𪜶用tsiânn大塊ê石頭鍤(tshiah)做長篙形ê石槽，因為外形kah日本古墳時代ê棺柴欲仝仔欲仝，予早期ê日本學者號做「岩棺」，現此時已經有發現超過16座ê岩棺，是講內底suah lóng無任何人類ê骨頭，遮ê大約tī 2千8百年前所做出來ê岩棺，伊ê實際用途到今 (kàu-tann)猶無人知影。
仝款予人感覺tsiânn神祕ê物件，猶閣有tī東部海岸kah縱谷地區ê巨石遺蹟：有肩單石、有槽單石、石輪、人形石像、石柱kah石壁等，總共有數百件，散落tī超過65搭ê考古遺址。遮ê巨石遺蹟有可能kah建築結構抑是宗教儀式有牽連，反應出彼時ê人tī信仰kah社會行為ê多樣性。
落葬，𫝛款是史前文化ê重要儀式。Tī花蓮地區，有一陣人是用大型ê甕來做埋死者ê棺柴，予人號做「甕棺葬」。親像這款ê方式tī台灣西南部mā有teh用，只不過遐ê甕棺葬多數用tī囡仔，成年人是採用「倒覆葬」——予死者ê面向下跤、尻脊骿向頂面來囥踮墓壙內底。
到新石器時代ê尾期了後，台灣西部地區有突破另外一項技術，𪜶已經掌握新ê技術「還原燒」來燒瓷仔ah，會當做出別位無地看ê烏色粗瓷仔。
整體來講，這个時代ê台灣史前文化有影是百樣款，互相之間有相𫝛ê、mā有無仝ê。比論講，台灣有tsiânn濟搭ê遺址，lóng有發見kah國寶人獸形玉玦(kuat)欲仝ê物件，包括新北十三行、台北芝山岩、宜蘭丸山、花蓮大坑kah荖山、台東卑南kah上里、屏東Chula閣有台南三寶埤等遮ê所在，毋過若詳細來kā看，每一个人獸形玉仔所做ê耳鉤，lóng有淡薄仔精差。
其中，丸山遺址所出土ê人獸形玉仔做ê耳鉤，數量是上蓋濟ê。遮ê玉器差不多是離這馬4千年前到1千外冬前ê這段時間，全台灣lóng看會著。閣較重要ê是，一直到今，tī台灣以外ê地區猶無發現親像這款ê玉器，予咱看著台灣史前文化獨特ê所在。
1-4 金屬kah工藝ê突破：鐵器時代
照理來講，tī世界tsiânn濟所在ê新石器時代，接紲落是會發展做青銅時代，猶毋過台灣ê史前社會suah無明確ê青銅文化階段，顛倒是直接uì新石器時代演變做鐵器時代。
離現此時量其約2千3百冬前，tī台灣各地ê遺址當中，就看會著uì外位來ê玻璃珠仔。遮ê玻璃物品毋是在地出ê，是綴島外ê人kah貿易ê方式傳入來台灣ê，這表示技術kah文化交流teh楦闊，mā會當正式kā台灣標記做是已經掌握懸溫工藝技術ê時代。2003年，杜鵑風颱搧入去台東ê太麻里，痟狗湧kā海沙埔絞了了，無意中suah kā幾具仔石板棺搤出來，才kā封tī內底規千冬ê「舊香蘭遺址」現出來予人看著，就按呢改變本底咱對史前原住民工藝技術ê認捌。
用青銅做ê、頂頭有人面頭像ê刀仔，是排灣族tsiânn有代表性ê傳家寶。猶毋過，考古學者上早發現ê青銅刀柄，suah是tī台灣北部淡水河口南岸ê「十三行遺址」所出土ê。因為過去lóng認為台灣無製造青銅ê礦物kah技術，tī學界久長以來lóng推測遮ê青銅器應該是外來ê、進口ê。
不而過，因為tī舊香蘭遺址有挖出用tī製造青銅刀柄、kōo石頭做ê鑄模(tsù-bôo)，證明講這款tsiânn有風格ê青銅器，實際上是台灣在地生產ê。這毋但是kā早期「島外進口」ê假說翻案niâ，mā表示講台灣自鐵器時代了後，就有用懸溫來熔鐵ê這款技術，mā有才調做閣較幼路ê金屬工藝ê能力。是講，鍊青銅器ê原料是uì佗位來ê？一般認為，應該是kā其他用銅做ê物件，熔了後才閣再利用。這毋但表示彼時ê人tī掌握火ê溫度方面已經tsiânn有才調，mā會當去製造代表家己文化ê物件。
毋但鑄造青銅器niâ，舊香蘭遺址閣有發現黏tī鐵棍仔頂頭ê玻璃珠，閣有tsiânn濟做珠仔ê原料—玻璃條，猶閣看會著有鍊金技術證據ê粗瓷仔片。進前咱uì十三行遺址就知影史前原住民已經有掌握做鐵ê技術ah，舊香蘭遺址是閣再進一步來證明，tī青銅器、玻璃珠kah黃金等等這款溫度愛懸ê工藝領域，𪜶ê技術能力mā已經是tsiânn有程度ah。
另外，舊香蘭遺址mā挖出兩件用台灣玉所做ê三稜耳鉤，這款ê物件主要是tī東南亞teh時行。Uì遮，咱就知影tī 1、2千年前，台灣島裡ê原住民早就已經kah東南亞等島外ê人，不時有teh接接(tsih-tsiap) kah交流ah。
閣較特別ê是，舊香蘭遺址有挖出tsiânn濟蛇形圖案ê器具。這寡圖案毋但tī粗瓷kah骨角器頂面看會著niâ，猶有一件表面有蛇蝹做一蜷(khûn) ê圖樣、雕刻甲tsiânn立體ê粗瓷仔缽，另外一件是刻兩隻蛇雙爿蜷踅(khûn-se̍h) ê石刀。Tī這寡直直出現ê蛇形意象，表示「蛇」tī彼當陣ê文化內底有tsiânn重要ê象徵意涵。
毋但按呢，舊香蘭遺址猶有出土tsiânn濟用人面抑是用人形來裝娗ê粗瓷仔，uì粗瓷仔頂面ê人所穿ê服裝特色，就會當看出是查某ê抑是查埔ê：查某ê四常會穿規領ê長衫，查埔ê是穿跤紮仔褲。這款具體ê文化象徵，予咱連想著現代原住民文化當中ê圖樣kah衫仔範。
Uì台東太麻里ê舊香蘭遺址向北爿行，盤山過嶺閣行過海岸線，島嶼東岸ê人群活動毋捌斷站。Tī數百公里遠ê宜蘭平原，mā仝款看會著遐ê人kah外界交流ê痕跡。
2001年，為著欲開發北宜高速公路，tī宜蘭縣礁溪二龍河kah得子口溪交會ê所在，考古人員發見一搭予溪水淹無去ê噶瑪蘭族舊社──淇武蘭社（mā號做芝舞蘭社）。淇武蘭社ê歷史會當稽考到大概6百冬前，tī遮有挖著tsiânn濟𠕇粗瓷仔、青花幼瓷仔、玻璃珠、瑪瑙珠kah各種金屬器等外位來ê物件，uì遮就知影，淇武蘭社佇彼當陣是台灣東北角不止仔重要ê貿易地點。這改所出土ê，毋但證明淇武蘭部落tsîng史前到歷史時代，lóng一直有人teh蹛，mā看會出來𪜶kah 1千4百年到8百年前ê文化層有tsiânn深ê交葛，這陣人uì鐵器時代以來所發展ê痕跡是tsiah-nī-á顯明。
Tī台灣各地，其實lóng揣會著uì史前彼當陣紲接落來一直到現此時原住民文化ê痕跡。用花蓮ê「水漣考古遺址」來做例，附近ê水漣部落一直kā彼搭看做是祖先蹛過ê所在。早期因為tī遺址內底有去挖著粗瓷罐仔，感覺hām阿美族傳統提來貯水、祭祀所用ê器具欲仝仔欲仝，所以去予學界看做是「阿美族ê史前文化遺址」。猶毋過後來，水漣部落有tsiânn濟族人去爭取正名，族名叫做「撒奇萊雅族」mā已經成功，無
閣予人箍tī阿美族內底。這件代誌teh提醒咱一个tsiânn重要ê點：人所講ê「阿美族」、「撒奇萊雅族」這款ê族群分類，其實是這1、2百冬來才發展出來ê定義。對史前時代的人來講，根本都無按呢teh分。所以，咱teh看史前文化ê時，kā這馬咱teh區別族群ê做法，硬去套tī彼當陣ê人身上，有影是較無合。
台灣tsîng 3萬年前就有人tī遮生活ah，uì出土ê文物kah研究內底，咱會當理解著舊石器時代、新石器時代到鐵器時代，每一个時代lóng有伊特別ê文化款勢。同時，tī無仝ê時間內，直直會有新ê一陣人、文化抑是技術來到這座島嶼，島嶼會來容伊、化伊，落尾成做有家己特色、獨一無二ê台灣文化。
台灣tī南島語族ê起源研究內底，自頭到尾lóng一直徛tī關鍵ê地位。語言學ê比較研究來指出，南島語系ê多樣性，tī-teh台灣是上蓋集中ê，這表示遮tsiânn有可能是規个語族ê根頭之一。總是，若準按陳有貝所提出ê「山林內底ê南島語族」這个論點來kā看，台灣原住民族群是按怎來ê，就毋是干焦有uì外位徙來這款孤一个ê原因niâ，彼是久長以來所發展ê結果。因為台灣ê地形是變化萬千，資源閣不止仔豐富，無仝時陣ê外口人tī台灣落岫了後，就漸漸kah環境敆做伙teh生活，文化mā才沓沓仔tī穩定ê島嶼生活內底久長來發展，變做是人群「干焦入，無teh出」ê這款範勢。
按考古資料來觀察，台灣史前文化表現出tsiânn懸ê在地性kah多樣性。無論是大坌坑文化內底有刻索仔紋ê粗瓷仔、人獸形ê玉耳鉤、各地頭ê巨石遺蹟，或者是有特別風格ê青銅刀柄，lóng是島內ê人家己所創造ê文化成果，這tī附近ê地區毋捌看過。遮所留落來ê物件，毋但看會著台灣史前社會ê技術kah信仰，mā代表台灣tī-teh南島語族ê體系當中，是有獨立發展ê文化地位。按遮來看就知影，台灣ê史前史，正正就是今仔日原住民族文化ê前身kah延續。
傳統ê看法是認為講冰河期結束了後，台灣脫離亞洲大陸，上古早ê史前南島語族，就按中國ê東南沿海抑是越南這搭渡海來到台灣。不而過，地質學kah古海洋學ê新研究suah是講，tī冰河期末期ê台灣猶tī東亞大陸ê邊仔角，海平面衝懸了後才漸漸變做是島嶼ê。也就是講，形成南島語族kah文化上蓋早ê所在，tsiânn有可能是tī這馬已經予海水淹去ê土地頂面。當當(tng-tong)土地沓沓沉落，有一部分ê人，順山脈kah海岸遷徙來到台灣，mā因為按呢就無kah外界閣有接觸。久長ê地理變化，予島嶼成做是一个kā早期南島文化貯(té)牢ê、上天然ê觳仔(khok-á)，mā予台灣tī南島語族ê演化地圖頂頭，成做一个關鍵、閣無人會替得ê所在。
無定著咱會使按呢講，台灣ê史前發展毋但是地方性ê歷史，更加是成做規个上早期ê南島世界ê標記。Tī咱越頭去看這段史前ê久長經歷，所看著ê毋但是台灣ê過去niâ，伊閣較像是一隻uì島嶼出帆、駛向世界去ê歷史之船。
