大迒界ê時代

17世紀彼陣開始，就有南北二路ê眾人來tī台灣交會：有代代tī遮徛起ê原住民，有定期來去ê漁民，閣有好膽來冒險ê海商。外人kā新ê商貿手路模式紮來，本島古早ê一寡交換網絡就牽連起來。這个勢面uì 17世紀下半期延續來到荷蘭、鄭氏政權kah清國初期。紲來，清帝國領土展大(tián-tuā)，台灣頭一改去予人收做殖民ê版圖。

為著統治欲在底(tsāi-té)，帝國tī台灣西爿倚山ê地區畫一條南北相迵ê界線，號做「番界」，島嶼就按呢分做東西兩爿。番界ê西爿漸漸轉做漢人移民社會，以種作稻仔、甘蔗為主。番界東爿ê原住民，雖然受著番界來阻擋，相對來講有保持自主性，毋過，若欲kah西部來交流就是縛跤縛手。舊底ê交換網絡，自按呢轉做較無明ê方式來延續。有番界兩爿迒界、踏過溝ê互動——無論是地理抑是身份方面——清代ê台灣就漸漸捏(lia̍p)出一个新ê面貌。

4-1邊界出現：海島去搪著陸地帝國

出島荷蘭長官ê情報

1683年，江戶幕府所直轄(ti̍t-hat) ê長崎(Tiông-kiā)奉行，得著出島荷蘭商館ê一條最新情報，講澎湖之役是清軍得勝，明鄭大敗。15世紀以來，東亞海域各方ê勢力紛紛擾擾，今(tann)這條消息來到地，就有thang落裁決ah。這塊故事，愛uì鄭成功出世ê故鄉，日本九州上西爿ê平戶(Pîng-hōo)來講起。

現此時ê平戶是一个平靜ê小漁港，毋過日本16至17世紀期間，伊是海洋貿易真重要ê港口。荷蘭、英國lóng捌tī遮設商館，kah東亞幾个國家捷捷來往。日本tī戰國時代結束、江戶幕府成立彼站，為著管理外國勢力，德川(Tik-tshuan)氏連紲推行幾若項嚴格ê規定。上早是禁止天主教來傳教，朱印船ê貿易mā kā停起來。到尾手，外國商館lóng總取消，干焦允准荷蘭kah中國海商tī teh長崎貿易，制限mā袂少。自按呢，荷蘭人著愛集中tī一个號做「出島（Tshut-tó）」ê人工島，中國ê生理人mā照規定愛蹛佇唐人屋敷(Tn̂g-lâng-ok-hu)。這區域管制tsiah-nī嚴，幕府若欲得著國際情報，遮就是頭一手來源。

17世紀後半，明、清政權當teh交替，一直相戰，東亞海域（特別是東海）受著tsiânn大ê影響，秩序亂操操。明朝滅亡，閣來南明政權改換種種形式欲延續，無甲20冬就煞了代。期間，東亞海域ê霸主鄭芝龍投降清廷，suah去予人處決。鄭成功欲揣一个所在重新徛起，伊決定ê目標就是台灣。1661年，拍１冬ê鄭荷戰爭煞鼓，台灣去予鄭成功奪去，荷蘭東印度公司就失去轉口貿易ê中心，貿易規模受著打擊真大。鄭氏政權tshāi明朝ê旗號，清廷為著欲對付伊，就嚴格來施行遷界令kah海禁。1670年代尾期，鄭經響應三藩之亂suah失敗了後，清廷就派軍來侵門踏戶。

1683年7月，澎湖海戰結束，鄭氏投降。清廷解除海禁kah遷界令，對東亞各國重頭來建立冊封(tshik-hong)、朝貢(tiâu-kòng) ê體制，這是以中國為中心來起造國際政治秩序。朝貢體制，就是中國進行冊封ê儀式，雙方建立「宗主—藩屬(huan-sio̍k)」關係ê制度。名義來講，朝貢國著愛尊奉中國、定期進貢；實際，中國袂去干涉人ê內政，雙方原在是獨立ê國家。朝貢秩序內底ê國家，比論朝鮮(Tiâu-sián)、琉球kah越南，lóng是遵照朝貢體系來進行國家對國家ê來往交陪。

配合朝貢體制，閣有「互市」這號貿易制度。設一寡條件來允准特定地區ê民間生理人會當迒國貿易。元朝到明朝ê海禁政策是不止仔嚴格，若清廷，是利用港口ê出入口許可(hí-khó)來控制迒國ê往來。有ê國家無屬於朝貢秩序，比如日本、南洋ê呂宋各國，猶閣有規模猶閣較大ê民間海上貿易，lóng遵照互市所設ê大原則來互相交流，kah世界經濟有來有往。有朝貢kah互市互相配合，東海這箍圍ê各國，特別是無屬於朝貢秩序ê日本，𪜶kah中國、朝鮮、琉球各國lóng有設管理制度來互相對應。按呢，對內是政權顧會在，對外是各國互相私底下有承認，號做「分棲共存(Hun-tshe kiōng-tsûn)」。

相對東海國家來講，南洋ê政權較欠管理ê功能，海上貿易就由據在(kì-tsāi)華人海商kah歐洲船隊來tshuā頭。清帝國kah南洋來往應對，原在利用「互市」這款規則，以港口出入口ê管控為主，對台灣出入口ê管理方式，mā親像對待南洋。

官府以外ê世界

咱越頭來看清朝初期ê台灣西部這爿，利用彼陣真四常ê海圖來了解地理空間kah世界觀，就有thang發現早期ê台灣其實去予分做幾若塊，互相隔開，各所在是隨人有隔開ê無仝世界。這寡地理空間維持有機ê互動網絡，大大細細ê聚落互相競爭、合作，勢力mā隨歲月有起有落。

荷蘭東印度公司靠勢伊ê軍力占贏，面對各地界，利用「地方議會」這个方式來建立一个權力階級，以大員長官為中心，蓋成是「領主對封臣」ê關係。地方議會區lóng總有南路、北路、卑南、淡水ê這四个區。西半爿ê議會區，經過明鄭到清帝國初期，演變做一府三縣ê規格：以府城做行政中心，分出北路kah南路。北路號做諸羅縣，南路號做鳳山縣。各地理區域，利用港口來保持聯絡。

府城周圍就是台灣縣地區，Siraya（西拉雅）四大社ê所在。𪜶是上早去kah荷蘭東印度公司各方面lóng來接觸、合作；路尾，閣長期去予明鄭、清帝國來動員。人類學家kā四大社歸屬tī Siraya族，Siraya語ê書寫形式，是利用荷蘭語拼音來流傳ê新港文書。附近地區，閣有語言倚近ê大武隴（Tāi-bú-lóng，Tevorangh）四社。

南路是府城以南ê鳳山縣，遮是Makatao（馬卡道）語群ê地區，kah Siraya有親緣關係。鳳山縣上大ê平原是下淡水溪（這馬號做高屏溪）沖積ê下淡水平原，遮是𠢕作田ê「鳳山八社」世代所徛起ê所在，mā是台灣真早就開發ê地區。「淡水」這个地號名，看就知影遮是早期航海ê汫水(tsiánn-tsuí)補給地。若是閣向南去，迵過山海交接ê枋寮，順崎壁(kiā-piah)直直去就來到瑯嶠(Lông-kiâu)地區，今仔日號做恆春半島，遮有瑯嶠君主kah十八社。

北路ê範圍，差不多就是uì府城以北開始，包括嘉南平原、濁水溪kah大肚溪流域(liû-
hi̍k)，一直到甲淡水廳kah東部山海ê交界。由南至北，頭先是諸羅縣境（這馬ê嘉義）到甲濁水溪流域南爿，遮主要是目前人類學家kā分類號做洪雅族ê社群。閣再向北，就來到濁水、大肚溪流域，猶未過大甲溪。遮就是較晏才成立ê彰化縣範圍，地形平坦、塗肉閣肥，發展農業ê條件是一等ê。

濁水溪平原這搭，原住民族群主要是Babuza（巴布薩）族。台中地區照伊ê地理環境是分做海線ê Papora（巴布拉）kah山線ê Pazeh（巴宰）。這寡社群，荷蘭時期捌有一个部落聯盟，「大肚番王」就是其中出名ê頭人。這个部落聯盟ê地位kah「瑯嶠君主」、卑南覓（Puyuma）排做伙，在咱理解，應該是發展較懸坎ê政治組織。

向北閣來去，來到竹塹（Tik-tshàm，這馬ê新竹）地區，主要是Taokas（道卡斯）族群ê所在，分做竹塹、後壠kah崩山三大社群。這馬ê桃園這搭有南崁五社，人類學kah語言學家經過研究，kā分類屬tī龜崙族，認為是凱達格蘭ê分支(hun-tsi)。繼續向北來到淡水廳，就是大台北盆地kah伊周圍ê所在，屬於凱達格蘭族ê範圍。北海岸到東北地區有巴賽人，𪜶上有名ê就是商業交換方面真活動。

北路ê範圍若一直楦(hùn)去到東部，以秀姑巒溪為界線，北爿有噶瑪蘭ê 36社、kah崇爻(Tsông-ngâu) 9社。來到秀姑巒溪南爿，名義是鳳山縣所管轄，有卑南覓72社。東部ê社群，干焦Kebalan（噶瑪蘭）地區尾仔有收tī-teh版圖。大部份ê社群，官府kah𪜶維持接觸是真有限，𪜶久年以來lóng是保持獨立自主。

土牛溝界線

清帝國統治台灣早期，講著漢民kah原住民ê區域管理，猶未有較明ê「人為界線」，「番社」kah「漢庄」中間無分甲真開，都干焦按照原住民受著動員ê程度，kā分做「土番」kah「野番」。年久月深，政府漸漸就照原住民ê動員程度，以及有負擔勞役(lô-ia̍h)抑無，kā分做「熟番」kah無屬於這个秩序ê「生番」。一部份原住民族是有登記列冊，交予社商、通事代辦來kā官府納餉(la̍p-hiòng)，不而過kah官府無teh直接接觸，mā無接受動員，這款ê就號做「歸化生番」。

1721年（康熙60年），tī羅漢門（這馬ê內門區）飼鴨為生ê朱一貴，袂堪得百姓ê血汗錢去予台灣知府王珍來剝削(pak-siah)，就徛旗號發起行動。短短10工，就攻奪府城、諸羅kah鳳山3个城池。朱一貴事件雖然前後才一個月日就平定，毋過清廷已經有相當ê警覺。

羅漢門是tī-leh台南、高雄交界相連紲ê山崙地區，交通無利便，居民tsiânn濟人練武自衛(tsū-uē)。漢人移民去山區了後僫(oh)得控制，恐驚會成做政治ê後患(hiō-huān)，所致，清廷tī隔冬就踮倚山ê所在畫一條南北相迵ê界線。頭起先是tshāi石碑來標示niâ，到乾隆時期才開始起造實質ê防禦工事(hông-gū kang-sū)，堆塗挖溝，合稱「土牛溝」。主要ê目的是欲禁止漢人伐(hua̍h)過邊界，走入去山區。

番界政策訂好勢了後，「界內熟番」、「界外生番」ê這款規範就出來ah。有國家力量來畫界線，族群身份就會去牽連著地理界線按怎來畫。尾仔民間kā熟番號做「平埔」，就是這个緣故。

乾隆後期ê林爽文事件了後，官府就動員熟番來守衛番界，閣撥(puah)一寡界外ê土地來補貼伊ê生活，這號做「番屯制度」。清國時代ê台灣，界線以內ê熟番一直是官府主要動員、結盟ê對象，一寡政策閣會kā保護。毋過19世紀濟濟ê漢人移民過來了後，平埔熟番ê壓力真大，大多數姑不將就放棄原本ê家園，遷去界外ê所在，比如埔里、宜蘭kah台灣東部。終其尾，𪜶是番屯制度失敗ê犧牲者。

猶未有番界政策進前，山區kah平原地區來往交換ê網絡，lóng tsiânn保持流通。相隔較遠ê地區，就利用各港口來連絡。平原kah山區，互相供應對方所欠缺ê物資。平地有鐵器、鹽這款生活ê必用品，甚至有親像火索銃、火藥這款武器，這寡lóng是山區足需要ê物資。啊tī山區，就有珍貴ê山產、木料，若轉賣去平地就有thang趁著大條利益。這寡交易(kau-i̍k)毋但是物質方面ê交換，甚至牽連大範圍ê文化交流。不而過，帝國為著治安就展現伊國家ê力量，民間自本ê交流網絡，就按呢kā切斷去。

民間ê物資交流去予番界來阻擋，毋過，合法kah非法ê迒界交易管道，原在是有。閣再講，這兩款迒界ê管道，一般都毋是烏白兩爿teh相對扴(tuì-ke̍h)；伊甚至是兩爿內外相摻(tsham) kah做規个。

4-2 Tī界線內部ê迒界

番界內部ê這片區域，面對大時代ê變動，各族群lóng著愛家己拍拚來加強勢力。這包括大肚社群內底ê岸裡社(Huānn-lāi-siā)，閣有來台開墾ê漢人移民。

「大肚社群」較早是台灣tsiânn重要ê一个部落聯盟。𪜶是以大肚溪流域為中心，北爿迒去到苗栗山崙地區，南爿是到甲彰化平原，內底包括幾若个語言區。自從17世紀，大肚王國三番兩次去受著外來政權（荷蘭東印度公司、明鄭政權、初期ê清帝國）來挑戰，毋過原在保持相當ê自主地位。

到甲17世紀後期，這个部落聯盟內部因為語言kah文化有精差，就分做海線、山線兩个大系統teh競爭。海線系統是台中盆地外圍，一直到西部海岸線ê Papora群；山線是台中盆地內部ê Pazeh群。這兩爿，清廷運用ê統治策略無仝款，漢人入侵ê壓力mā大細有差。

清帝國統治時代ê台灣，漢人ê移民袂輸大湧直直湧入來，這tī進前ê外來強權時代lóng毋捌有。雖然官府採用一寡辦法欲限制，毋過來到18世紀初期，中部平原ê鹿場已經漸漸去予漢人ê開墾集團kā轉做水田ah。漢人ê聚落愈來愈闊，生產方式、自然環境lóng有改變，這就kah原住民真有干礙，礙著ê毋但是族人ê生活，甚至有𪜶ê文化kah世界觀。大肚社群這塊所在，土地欲發展農業是真有向望，mā是漢人移民相爭欲奪取ê目標。所致自18世紀以來，土地一直失守，壓力kah挑戰lóng tsiânn大。閣較予族人感受著威脅(ui-hia̍p)加倍大ê，猶有清帝國政府ê態度。

名義來講，官府對漢人是欲限制、持防(tî-hông)，毋過官府ê本質，上無kah漢人有共同ê政治文化基礎。政策一變再變，漢人往往(íng-íng)都有才調來趁空縫(thàn-khang-phāng)，撚(lián)著大利頭。啊若是族人去kah漢人鬧出是非，官府suah常在無thang好好仔處置。毋但按呢。官府ê勞役濟閣重，閣由在下跤手ê漢人社商kah通事去胡亂抾稅削，致使族人久年ê積怨。

屬tī Taokas系統（崩山八社）、徛tī台中盆地以北ê苗栗山崙地區ê吞霄社，1699年頭一回發起行動欲反抗清帝國，路尾去予人鎮壓。官府、漢人移民，閣有其他ê原住民社群mā欲來競爭，三爿濫做伙中間ê牽連詭詐多變。中部ê原住民社群，是按怎來步數盡展，用種種策略來應對官府leh？

岸裡社ê選擇：Uì大甲西社事件到潘賢文大遷徙

岸裡社屬於台中盆地內部ê Pazeh系統，自早是蹛tī-teh大甲溪北岸、內陸ê后里(Āu-lí)台地。𪜶kah海線ê Papora系統是競爭關係。清國時代初期是kā岸裡社算做是「生番」，也就是kah官府較生疏無來往、毋免服勞役ê原住民。

岸裡社群會去kah清廷合作，頭起先是為著1699年ê吞霄社事件。彼陣，吞霄社tī-teh苗栗山崙地區以南，屬於崩山Taokas社群，為著漢人通事來欺占就發起行動。清廷動員府城附近ê Siraya四社，進攻tsiânn久suah無伊ê法，雙方死傷tsiânn慘重。路尾手岸裡社群去予清廷邀請，土官阿穆就tshuā族人uì山後來暗攻，才thang攻破吞霄社。這就是岸裡社群kah清廷ê頭一改合作。岸裡社ê酬報，就是大甲溪南岸ê開墾權，伊本社（閣號做大社）就遷落南，來到這馬ê台中豐原、神岡這箍籬仔。

1731至1732年，大甲西社事件爆發，這是清代規模上大ê平埔原住民反抗事件，發生tī-teh中部台灣（大甲溪南爿一直到大肚溪南爿）。代誌會來爆發，直接ê緣故是熟番袂堪得官府勞役，大甲西社ê林武力就召集眾人欲起事抗官。原底熟番反抗ê規模無超過附近ê東社這寡崩山八社ê社群，官民ê相戰直直無輸贏袂收煞。隔冬，官府kā彼寡大肚社內底無參加ê無辜社番誣賴、處決，閣提這去kā頂司討功勞，就此來犯著眾怒。包括大甲溪到大肚溪南岸ê Papora熟番社群，就聯合起來響應，大約2千人來圍攻彰化縣城，閣放火來燒漢人ê庄頭。代誌愈絞愈大條，大安溪北岸ê崩山社群、大肚溪南岸ê番社， lóng總差不多50外社， mā做陣來鬥相贊。

毋過若是岸裡社，伊過去既然捌kah清廷合作，又閣長期kah大甲西社對敵。這回看著大甲西社起兵反抗，岸裡社理所當然是閣再徛tī清廷這爿來結盟，mā拄好趁這个機會來kā勢力閣拚予較大。

稱霸中部ê番頭家

四周圍ê原住民差不多lóng是欲反抗ê，毋過岸裡社再三考慮利害關係，又閣決定kah清廷結盟，出力來平定叛亂。清軍uì鹿港起船，一路向北，壓制海線ê Papora社群。

經過大甲西社事件，西部族群ê成份就來改朝換代，平埔族無thang閣再威脅漢人移民。盆地內部ê岸裡社群mā得著大片ê土地做賞賜。清代台灣ê熟番來講，岸裡社就成做上蓋重要、力量上大ê合作對象。這馬彰化縣城外ê山，改名號做「定軍山」，山頂ê制高點（這馬八卦山大佛ê所在）mā起一間「鎮番亭」。1732年，岸裡社土官敦仔接受清帝國ê榮典，有史以來是別位土官lóng毋捌有，干焦𪜶去予雍正皇帝來召見，受封正七品ê官銜、受賜蟒袍(bóng-phàu)，封號「大由仁」，不止仔奢颺。18世紀𪜶當旺當衝(tshìng)彼陣，岸裡社ê勢力範圍向南一直到台中盆地內圍ê西屯彼搭，向北去到苗栗。岸裡社毋但是武力真強，mā接受漢人ê耕田文化kah生活方式。

岸裡等四社kah粵(ua̍t)籍通事張達京合作，聯合漢人六館業戶割地(kat-tē)換水，來開鑿(khui-tsha̍k)也號名做猫霧捒(Babuza)圳ê葫蘆墩圳。岸裡社tī台中盆地ê熟番部落徛王稱霸，招募漢人佃戶，收租幾若千石(tsio̍h)，漢人叫伊「番頭家」。路尾張達京去予清廷革職，岸裡社土官敦仔就通事、部落領袖ê權力做一睏搦(la̍k) tī手頭。伊這款合作ê勢面，到乾隆年間上衝，閣去予皇帝賜姓「潘」。現此時神岡ê岸裡大社公館舊坐址(tsō-tsí)，猶有thang看著彼當時ê榮光。毋過，岸裡社ê榮景mā無一直順續(sūn-sio̍k)到尾。

19世紀初期，台灣西半爿ê平原，有thang開發ê土地已經開發了了ah，規个成做漢人為主ê移墾社會。水田種稻來講，mā是漢人較𠢕(gâu)。自按呢，漢人就漸漸掌握大權，有thang實質來支配土地，若岸裡社規个看起來，欲kah漢人競爭是真硬篤(ngē-táu)。雖然乾隆朝有設一个機構號做「理番同知」，來保障、協調熟番kah漢人ê糾紛，毋過趕袂赴時代ê變化，漢人移民tī遮早就已經占贏面。Tī政治經濟kah文化方面ê壓力lóng真大，岸裡社又閣面對一改選擇。𪜶是欲繼續tī遐做漢人社會ê少數人，抑是kah漢人濫做伙；或者kah其他ê「熟番」講和、莫計較恩怨，逐家鬥陣踏出番界去走揣新天地？

岸裡社ê上尾一注(tù)：潘賢文開墾羅東

蘭陽溪以南ê羅東、礁溪、三星這幾个所在，lóng捌號名做「阿里史」，這地號名本身就是記錄羅東ê開墾史。羅東ê城隍廟，有供奉幾个移民ê頭人：潘賢文、茅格。其中，潘賢文是岸裡社群ê阿里史社（這馬ê台中潭子）ê青年。伊號令中部ê平埔熟番，倚千人欲去噶瑪蘭開墾，聲勢真大。1804年（嘉慶9年），𪜶盤山過嶺來到蘭陽平原，初初是tī五圍（這馬ê宜蘭市）來徛跤。

閣紲來5冬，潘賢文tshuā頭ê中部平埔族，代先是去予牽拖入去當地ê漳泉械鬥(hāi-tàu)。失敗了後，就盤過蘭陽溪去到羅東。閣出兵援助清廷，tī蘇澳這搭來kā海盜朱濆(Tsu Bùn)拍予退。1809年漳泉械鬥，潘賢文這幾个頭人tī羅東ê一个暗暝時去予漳州人拍死，族人就逃散去周圍ê聚落避難，勢力就敗去ah。

平埔認同ê初起

平埔族群kah漢人lóng慣勢作田，若欲移民去番界外面，猶有幾个大目標：蘭陽平原、埔里盆地、東部ê縱谷(tshiòng-kok)平原。

19世紀初期，中部ê平埔族群一直受著壓力， 1823年就再一次大規模遷徙，去到埔里盆地。真拄好， 1820至1830年代，南部ê Siraya、Makatao（屏東平原鳳山八社）這寡族群，若毋是遷去高雄、屏東ê山跤地帶，無就是沿楠仔仙溪、荖濃溪，一直踏入去到中央山脈；或者是掠恒春、台東彼爿面分散去到花東縱谷kah海岸ê所在。蘭陽平原ê Kebalan族，mā仝時陣落南去到花蓮平原ê北部。

遮ê聯合遷徙，內底ê聚落kah語言系統有幾若个，新ê身份認同自按呢就浮出來：逐家既然仝款去受著官府kah漢人來壓迫，各族群就甘願先排除恩怨kah仇恨，來解決仝款lóng拄著ê生存問題。

4-3 界線外部來迒界

社會秩序重閣撨摵(tshiâu-tshi̍k)

18世紀後期，像「八堡圳」、「瑠公圳」這款ê大型水利工程完成，真濟旱田就轉做水田。自按呢，西部平原就成做是漢人移民社會內面一座富足ê「台灣米倉」，毋但農業生產力大大提懸，mā唌(siânn)著愈濟漢人uì南爿徙北、湠去到西部各所在。

這个「水田化運動」，其實是對區域發展ê一項投資，或者thang講是地區ê權力kah資源重新來分配。欲起造水利設施，毋但是資金、人力愛攢甲到，有時陣武力mā會用著。開墾者著愛有經營企業ê能力kah策略，才有法度kah官府、原住民hām其他ê漢人群體來盤撋(puânn-nuá)競爭。真濟開墾集團，本身就有資本kah技術來phik-kok來靠勢，一寡遊戲ê規則伊閣熟手，欲tī遮kah人相輸，自然是較有贏面。

移墾ê過程，開墾者根據伊ê原鄉背景，kah眼前ê地理條件所發展出來ê生活模式kah結盟策略就各地無仝。泉州人主要徛tī港市地區，𠢕做生理。漳州人就較倚做田ê內陸所在，濟濟聚落就辮(pīnn)做一个密集ê網絡。抑若粵籍（客家）族群，主要分布tī山跤，骨力teh開墾邊區ê土地，閣kah原住民保持互相利益，mā kah官府好禮來對待。逐改有族群衝突，客家徛tī官府這爿來鬥出力平定動亂，按呢就漸漸激出彼號客家義民ê形象。

猶毋過，開墾集團若是相拄著，為著爭取資源，雙方mā是會發生衝突。1782年，彰化縣城彼跤兜，發生頭一改大規模ê漳泉械鬥，中部地區ê族群分佈就愈來愈分明。1787年，為著清廷查緝(tsa-tsi̍p)天地會，林爽文就tī漳州林氏ê聚集所在，也就是番界交接地帶ê大里杙（Tāi-lí-khi̍t，現今ê大里）徛旗起事，這是台灣歷史規模第一大ê動亂kah戰爭。Uì泉漳械鬥到林爽文事件，就看會著漢人ê威脅已經毋是熟番所致，這馬顛倒是漢人中間互相為著資源teh競爭。

這段時期社會變遷，綴teh改變ê就是產業結構。西部平原ê農業經濟系統漸漸就以稻米kah糖為主，商品經濟mā自按呢來楦闊(hùn-khuah)。若是倚山跤地區ê客人庄，就利用樟腦產業kah山產ê買賣來討趁。這寡區域ê產業選擇，毋但是愛考慮地理條件，mā hām族群文化kah開墾ê策略有真大ê牽連。

西部港市有起興，台灣kah對岸ê閩粵地區ê經濟連結就閣較強。人講「一府（台南）、二鹿（鹿港）、三艋舺（萬華）」，西部各大港是貿易kah移民ê主要根據地，各港口本身ê郊行(kau-hâng)網絡lóng tsiânn闊，有thang來鬥組織商貿、收稅kah運輸。這幾个港市毋但是物資ê集散地，mā是文化kah信仰主要ê傳播中心。

漢人社會建立起來，毋但是家己經濟活動ê成果，mā有文化體系來徙栽kah重新起造ê意義。原鄉ê信仰、民俗傳來台灣，經過廟宇、祭祀箍仔kah地方信仰，重新落地釘根，建立密切ê社會網絡。閣來，人口穩定、財富累積了後，士紳階層就漸漸起來。𪜶利用科舉考試來踏入清廷ê體制，𪜶tī地方ê權威地位就有thang閣較徛在。

番產交易kah迒界ê人

岸裡社kah漢人移民社會， lóng是tī-teh番界內部。相對這號活動狀態，猶有一款人是無仝地界teh來來去去，𪜶無受著番界內外來制限，成做彼時重要ê中人。

《賽德克巴萊》這齣電影裡，青年莫那魯道去到一間漢人經營ê交易所，提獵物欲換鹽。無拄好，對敵部落「道澤群」ê獵人mā紮獵物欲來交易，雙方險仔欲起跤動手。佳哉，交易所頭人kah身邊武裝ê漢人，火索銃即時就捎(sa)出來，kā莫那魯道點醒講遮是中立地帶，危機才暫時化解。電影這个所在，有幾若項重要元素藏tī內底。

頭一點，自從清朝統治2百外冬一直到日本時代初期，山區kah平地這款物資交流ê方式lóng猶毋捌斷過。電影內底teh交易ê物件，比如講山產獵物、平地ê鹽，對雙方lóng是珍貴ê物資，所致中間人有thang趁著大條利純。這就敢若人teh講ê「刣頭生理有人做」，清國時代ê台灣，欲迒過番界去到山區ê經營交易所，毋但國家袂來保護，甚至是犯法ê代誌。既然無國家ê力量來保護，這寡生理人著愛武力kah經濟實力齊備，lóng是無簡單ê冒險家。

雖然是禁止迒過邊界，毋過既然兩爿lóng有物資需求，就毋是喝切就切會斷。官方雖然有限制，其實原仔有合法ê交易管道。譬喻講「通事」負責連絡漢人kah原住民ê領域，閣有「軍工匠(kun-kang-tshiūnn)」愛踏出番界去收集木料，這兩款人lóng是官方允准ê。話閣講轉來，遮ê人ê身份kah彼寡非法迒界ê「番割」、「土生仔」mā毋是兩爿對扴，顛倒是互相內外出入ê家己人。這寡人lóng會透過迒界來展大、來為家己卯(báu)閣較濟ê利益。𪜶ê身份毋是hiah-nī清楚，行動予人看袂明，利益閣牽連著幾若个族群，所致，𪜶常在是官府上蓋持防ê對象，予人kā當做動亂ê根源。不而過事實來看，這寡人是文化交流ê良媒，包括物質、制度，甚至文化kah觀念ê交流勻勻仔粒積，歷史就是按呢來行進前。17世紀東亞海域ê海禁時代，海商mā是親像這款ê角色。

落難成做「漂流民」

1803年（日本江戶時代享和3年，嘉慶8年），一隻日本松前地區（這馬北海道倚南爿ê所在）ê商船「順吉丸」，去拄著風颱雨，漂流來到台灣東部ê秀姑巒溪口（這馬ê大港口這搭）。船長文助去予當地ê阿美族頭人（mā有可能是漢人ê生理人，穿插毋是當地ê原住民）留tī遐做4冬ê苦工，尾仔才有一个號做馬安ê瑯嶠生理人來救助，kā送去府城，拜託清廷官僚ê送還體制，終其尾才有thang倒轉去日本。

自從乾隆初年，清帝國就有起造一套應對國際秩序ê「漂流民救濟送還體制」。只要去報予官府知，彼个地區無論啥物階級ê地方官，lóng有義務來救濟漂流民。路尾手，漂流民綴伊彼國ê朝貢使節(sù-tsiat)做伙返轉故鄉。雙方若是無外交關係，比如日本，按呢就照自早就有ê對外渡口，交予海商來協助遣返(khián-huán)，文助ê返鄉路線就是這款ê。

頭前這个漂流民，是拄好有報予官府，咱才有thang看著，實際數量拍算是猶閣較濟。大部份狀況，民間處置漂流物資其實有家己一套辦法。遮ê交易網絡kah進前所講ê界外番產交易互相結合，透過各港市有來有去。有這款界外「無看見」ê流動kah交換，咱對歷史面貌就有別款ê想像。比論講照時節掠魚ê網絡、各區域地界ê番產交易，猶閣一寡港市有thang相接番界內外，甚至接去到親像是日本、南洋ê海外所在。

邊界以外，無看見ê人

這寡邊界外面「無看見(bô-khuàinn)」ê人，無論伊是番產交易ê中人，抑是意外來到異鄉ê漂流民，咱lóng會當看著清代台灣ê邊界，毋是像表面按呢𠕇篤(tīng-tauh) lóng袂變。遮ê人迒界出入，kā原底內外ê框殼捒振動，這就是後過仔政策轉變ê關鍵。

台灣因為有海洋貿易，自17世紀就來踏入歷史舞台。予清帝國收入去新版圖了後，好親像就接受大陸型ê治理手路，海洋特質就勼(kiu)無去，成做大陸邊仔ê一塊零星地。其實，台灣自本ê貿易網絡 lóng毋捌斷站。官方ê管制都有限，所以伊猶原相紲teh進行。清代台灣前期ê歷史，咱按怎來理解leh？總講，就是「流動」。毋但是山河地理ê流動，mā有身份、界線這方面ê流動。

華南地區ê海洋商業性格tsiânn重，民眾走海路去別位做生理、移民、tī當地釘根，kah當地人互動無礙。終其尾，就是這規个網絡綿延(biân-iân)相牽，台灣ê面貌就來改變，變做是漢人為主ê移民社會。

19世紀開港通商了後，各區域人群ê互動，就去受著近代西方主權國家概念ê身份制度來規範。較早自「番界」牽出來ê「漢民、生熟番」這款界線，就去拄著挑戰ah。彼寡「無看見」ê空間kah人，這馬就漸漸去予國家「看見著（khuàinn-tio̍h）」。這个變遷就是一个斡角，表示清國統治ê台灣，今一步一步欲向近代ah。